काठमाडौं । सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछाने ले देशका विभिन्न स्थानमा विकसित पछिल्लो परिस्थितिका बीच सामाजिक तथा धार्मिक सद्भाव कायम राख्ने उद्देश्यले धार्मिक अगुवाहरूसँग छलफल गर्नुभएको छ।
शुक्रबार सिंहदरबारस्थित रास्वपाको संसदीय दल कार्यालयमा भएको छलफलमा मौलाना नरुल हुसेन, मोहम्मद खालिद, विश्व हिन्दु महासङ्घका महासचिव रामचन्द्र तिवारी तथा सचिवालय सदस्य राजुराज फुयाल सहभागी हुनुहुन्थ्यो।
छलफलका क्रममा सभापति लामिछानेले सुनसरी, सिराहा लगायत देशका विभिन्न भागमा भइरहेका प्रदर्शनलाई शान्तिपूर्ण बनाउन र सामाजिक सद्भाव तथा धार्मिक सहिष्णुता कायम राख्न सम्बन्धित समुदायमा सकारात्मक सन्देश प्रवाह गर्न धार्मिक अगुवाहरूसँग आग्रह गर्नुभएको छ।
उहाँले सबै पक्षलाई संयमता अपनाउँदै संवाद र सहकार्यका माध्यमबाट वर्तमान परिस्थितिको समाधान खोज्नुपर्नेमा जोड दिनुभएको बताइएको छ।
