काठमाडौं । नेपाली उपभोक्तालाई लक्षित नयाँ ई–कमर्स प्लेटफर्म ‘चाइनाबजार’ आगामी साउन १३ गते बुधबारदेखि औपचारिक रूपमा सञ्चालनमा आउने भएको छ।
नेपाली उपभोक्ताले कारखानादेखि घरसम्म वस्तु पुग्ने क्रममा थपिने अनावश्यक तह र मूल्य शृंखलाको लागतबिना गुणस्तरीय वस्तु उचित तथा पारदर्शी मूल्यमा खरिद गर्न सकून् भन्ने उद्देश्यले चाइनाबजार स्थापना गरिएको कम्पनीले जनाएको छ।
चाइनाबजारकी प्रमुख कार्यकारी अधिकृत (सीईओ) स्तुति श्रेष्ठका अनुसार नेपालमा आयातित वस्तुहरू लामो समयदेखि आयातकर्ता, थोक विक्रेता र वितरकजस्ता बहु–तहका आपूर्ति शृंखलामार्फत उपभोक्तासम्म पुग्दै आएका छन्। यसले वस्तुको मूल्य बढ्नुका साथै आपूर्तिमा समेत अनिश्चितता सिर्जना गर्ने गरेको उनको भनाइ छ।
चाइनाबजारले तेस्रो पक्षका विक्रेता वा आयात एजेन्टमा निर्भर नभई चीनका उत्पादकबाट आफैं वस्तु छनोट तथा प्रत्यक्ष खरिद गर्ने जनाएको छ। कम्पनीले आफ्नै ढुवानी सञ्जालमार्फत वस्तु नेपाल भित्र्याउने, आफ्नै गोदाममा भण्डारण गर्ने र आफ्नै वितरण प्रणालीमार्फत ग्राहकसम्म पुर्याउने योजना बनाएको छ।
स्रोत व्यवस्थापनदेखि आयात, भण्डारण र वितरणसम्मको सम्पूर्ण प्रक्रिया एउटै व्यवस्थापनअन्तर्गत सञ्चालन हुने भएकाले डेलिभरी समय छोट्याउन, लागत नियन्त्रण गर्न तथा वस्तुको मूल्यलाई पारदर्शी र प्रतिस्पर्धी बनाउन सहयोग पुग्ने कम्पनीको दाबी छ।
‘एन्जोय योर सपिङ’ नारासहित सञ्चालनमा आउन लागेको चाइनाबजारले प्रारम्भिक चरणमा विद्युतीय सामग्री, फेसन, जीवनशैलीसम्बन्धी सामग्री तथा स्वास्थ्य र सौन्दर्य सामग्री उपलब्ध गराउनेछ। आगामी दिनमा उत्पादनको दायरा थप विस्तार गरिने कम्पनीले जनाएको छ।
ग्राहकले ईसेवा र खल्तीमार्फत डिजिटल भुक्तानी गर्न सक्नेछन्। आफ्नै गोदाम तथा वितरण प्रणालीमार्फत आवश्यक मौज्दात कायम राख्दै छिटो र भरपर्दो सेवा प्रदान गर्ने कम्पनीको भनाइ छ।
सीईओ श्रेष्ठले नेपालको डिजिटल अर्थतन्त्र विस्तार हुँदै गएको र चीनसँगको व्यापारिक सम्बन्धसमेत थप सुदृढ बन्दै गएको अवस्थामा चाइनाबजारले यी दुवै प्रवृत्तिसँगै अघि बढ्ने लक्ष्य लिएको बताइन्। आगामी दिनमा उत्पादनको विविधता बढाउँदै देशभर वितरण सञ्जाल विस्तार गर्ने योजना रहेको उनले जानकारी दिइन्।
कम्पनीका अनुसार चाइनाबजार डटकम साउन १३ गतेदेखि www.chynabazar.com मार्फत औपचारिक रूपमा सञ्चालनमा आउनेछ।
