झापा। झापाको बिर्तामोड साना सहरी खानेपानी तथा सरसफाइ उपभोक्ता संस्थाले हाल ११ हजार धारामार्फत करिब एक लाख जनसङ्ख्यालाई २४सै घण्टा शुद्ध खानेपानी उपलब्ध गराउँदै आएको जनाएको छ ।
‘स्वच्छ खानेपानी, स्वस्थ र सभ्य नागरिक’ भन्ने मूल नारासहित आज आयोजित एक कार्यक्रममा संस्थाले हालसम्मका उपलब्धि र भावी योजना सार्वजनिक गरेको हो ।
संस्थाका अध्यक्ष मेघराज बाँस्तोलाका अनुसार बिर्तामोड नगरपालिकाका १० वटै वडा तथा अर्जुनधारा नगरपालिकाका वडा नं ५, ६ र ११ का केही क्षेत्रमा खानेपानी सेवा विस्तार गरिएको छ । हाल ५७५ किलोमिटर पाइपलाइन, तीन ओभरहेड ट्याङ्की तथा थप दुई आयोजनामार्फत सेवा प्रवाह भइरहेको छ ।
संस्थाले एसियन हाइवे विस्तारका क्रममा क्षति पुगेका पाइप लाइन प्रतिस्थापन, नयाँ डिपबोरिङ, फिल्टर प्लान्ट निर्माण तथा अर्जुनधारा–६ मा २०० केभिए ट्रान्सफर्मर जडानको काम अन्तिम चरणमा पुगेको जनाएको छ ।
यसै वर्ष बिर्तामोड नयाँ बसपार्क क्षेत्रमा थप बोरिङ जडान गर्ने र अन्य सामुदायिक खानेपानी आयोजनालाई क्रमशः एकीकृत गर्ने योजना पनि सार्वजनिक गरिएको छ ।
संस्थाले अव्यवस्थित प्लटिङ, सडक विस्तार र ढल निर्माणका कारण खानेपानी पाइप लाइनमा क्षति पुग्दै गएको संस्थाले जनाएको छ ।
पूर्वाधार निर्माणका क्रममा सम्बन्धित निकायबीच समन्वय हुन नसक्दा पाइप लाइन मर्मत र नयाँ धारा जडानमा समेत कठिनाइ भइरहेको जनाएको छ ।
“अव्यवस्थित प्लटिङ, सडक तथा ढल निर्माणका क्रममा समन्वयको अभाव हुँदा खानेपानीका पाइप लाइनमा क्षति पुग्ने गरेको छ । यसले पाइप लाइन मर्मत, नयाँ धारा जडान र नियमित सेवा प्रवाहमा चुनौती थपिएको छ ।
आगामी दिनमा सम्बन्धित निकायबीच प्रभावकारी समन्वय गरेर उपभोक्तालाई सहज, सुरक्षित र गुणस्तरीय खानेपानी उपलब्ध गराउने लक्ष्यका साथ संस्था अघि बढिरहेको छ”, संस्थाका अध्यक्ष मेघराज बाँस्तोलाले बताउनुभयो ।रासस
