काठानडौं । जापान र मस्कुलर डिस्ट्रफी फाउन्डेशन नेपाल (एमडिएफनेपाल)बीच मंगलबार अनुदान सहयोग सम्झौतामा हस्ताक्षर भएको छ।
नेपालका लागि जापानी राजदूत मासामिची साइगोले मस्कुलर डिस्ट्रफी रोगबाट पीडितहरूका लागि पुनर्स्थापना केन्द्र निर्माण गर्ने उदेश्यले एक करोड रूपैयाँ बराबरको अनुदान सहयोग सम्झौतामा आज हस्ताक्षर गरेका हुन्।
पुनर्स्थापना केन्द्रको निर्माण एमडिएफ नेपालले काठमाडौंमा गर्नेछ। एमडीएफ नेपालको स्थापना मस्कुलर डिस्ट्रफीका कारण आफ्ना सन्तान गुमाएका अभिभावकहरूले सन् २ हजार ३ मा गरेका थिए।
जापान सरकारको ग्रासरुट ह्युमन सेक्युरिटी प्रोजेक्ट (जीजीपी) अन्तर्गतको उक्त अनुदान सहयोगले नेपालका मस्कुलर डिस्ट्रफी रोगीहरूको स्वास्थ्य सेवाको अवस्थामा सुधार ल्याउने अपेक्षा राजदूत साइगोले व्यक्त गरे। यो परियोजनाले जापान र नेपालबीचको जनस्तरको सम्बन्धलाई थप मजबूत बनाउने विश्वास लिएको जापानी दूतावासले जनाएको छ।
