काठमाडौँ। सत्तारुढ दल राष्ट्रिय स्वतन्त्र पार्टी (रास्वपा) का संसदीय दलका उपनेता गणेश पराजुलीले संसदीय मामिला पत्रकारितालाई थप व्यवस्थित, मर्यादित र प्रभावकारी बनाउन न्युनतम मापदण्ड तय गरिनुपर्नेमा जोड दिनुभएको छ ।

सोमवार सञ्चारकर्मीहरूसँग आयोजित छलफलका क्रममा उहाँले यस्तो बताउनुभएको हो । पछिल्लो समय सञ्चारमाध्यमको संख्यामा भएको वृद्धिलाई दृष्टिगत गर्दै उपनेता पराजुलीले कार्यविधि (टीओआर) परिमार्जनको आवश्यकता औंल्याउनु भयो । संसदीय मामिलामा रिपोर्टिङ गर्ने सञ्चारकर्मीहरूको भुमिकालाई प्रभावकारी बनाउन संसद सचिवालयसँग समन्वय गरी आवश्यक प्रशिक्षणको व्यवस्था गर्नुपर्नेमा उहाँले प्रतिवद्धता व्यक्त गर्नुभयो । उपनेता पराजुलीले सांसद र सञ्चार जगत दुवैको जवाफदेहिता समान हुने उल्लेख गर्नुभयो ।

उपनेता पराजुलीले भन्नुभयो, ‘पहिलेको अवस्थामा एक वा दुईवटा मात्र मिडिया थिए भने आज मिडियाको संख्या अत्याधिक बढेको छ । यसलाई व्यवस्थित बनाउने क्रममा टीओआर कसरी तयार गर्ने, त्यसमा कसरी सुधार गर्ने भन्ने विषय महत्त्वपूर्ण छ । त्यसैगरी, संसदीय मामिलामा भूमिका निर्वाह गर्ने सञ्चारकर्मी साथीहरूले अझ प्रभावकारी रूपमा काम गर्न सकून् भन्ने उद्देश्यले यहाँहरूले नै प्रशिक्षणको आवश्यकता औँल्याउनुभएको छ । यो वास्तवमै सोचनीय विषय हो। संसद् सचिवालयसँग समन्वय गरी यसलाई कसरी प्रभावकारी रूपमा कार्यान्वयन गर्न सकिन्छ भन्ने पक्षमा पनि हामीले काम गर्नुपर्ने आवश्यकता छ । जवाफदेहिता जति सांसदहरूको छ, त्यति नै सञ्चार जगतको पनि छ । त्यसकारण दुवै पक्षको जवाफदेहितालाई प्रभावकारी बनाउन यहाँहरूले दिनुभएका सबै सुझाव मननीय छन् । यी सबै पक्षलाई व्यवस्थित गर्न न्यूनतम मापदण्ड तय गरिनुपर्छ। संसदीय मामिलासम्बन्धी पत्रकारिता गर्दा यहाँहरूले व्यक्त गर्नुभएका सुझाव, यहाँहरूकै एशोसिएशन तथा व्यावसायिक संस्थाबाट तय गरिएका आधारभूत मान्यता र अन्तर्राष्ट्रिय मापदण्डलाई समेत आधार बनाएर आवश्यक सुधार गर्नुपर्छ भन्ने पक्षमा पनि काम गर्न आवश्यक छ । आगामी दिनमा हामीले निर्वाह गर्ने संसदीय भूमिका वा कानुन निर्माण प्रक्रियामा मात्र होइन, यहाँहरूसँग अझ नजिकको सहकार्य गर्दै सबै जिम्मेवारी प्रभावकारी ढङ्गले निर्वाह गर्न हामी प्रतिवद्ध छौँ । यहाँहरूले सोध्नुभएको जस्तो सञ्चार जगतलाई बन्द गराउने वा कुनै प्रकारको बन्देज लगाउने हाम्रो कुनै सोच वा उद्देश्य छैन । त्यसको कल्पना पनि गर्न सकिँदैन । हाम्रो उद्देश्य केवल यसलाई कसरी अझ व्यवस्थित, मर्यादित र प्रभावकारी बनाउन सकिन्छ तथा यहाँहरूको अनुभवले के देखाएको छ भन्ने कुरा बुझ्नु मात्र हो ।’

सञ्चारमाध्यममाथि अंकुश लगाउन खोजिएको हो कि भन्ने जिज्ञासाको खण्डन गर्दै उहाँले प्रेस स्वतन्त्रताप्रति पार्टी प्रतिवद्ध रहेको प्रष्ट पार्नुभयो । उपनेता पराजुलीले आगामी दिनमा कानून निर्माणको प्रक्रिया र संसदीय भूमिकामा सञ्चारकर्मीहरूसँग नजिक रहेर सहकार्य गर्ने प्रतिवद्धता समेत जनाउनु भयो । –न्युज एजेन्सी नेपाल