काठमाडौँ । त्रिपुरेश्वरस्थित राहदानी विभागअगाडि आत्मदाह प्रयास गरेका मुगुका गणेश नेपालीको उपचारका क्रममा मृत्यु भएपछि घटनाको अनुसन्धानका लागि प्रहरीले तीन जना नगर प्रहरीलाई नियन्त्रणमा लिएको छ।
जिल्ला प्रहरी परिसर काठमाडौंका अनुसार नियन्त्रणमा लिइएका तीनै जना काठमाडौं महानगरपालिकाका नगर प्रहरी हुन्। उनीहरूमध्ये दुई महिला र एक पुरुष रहेका छन्। हाल उनीहरूलाई कालीमाटी प्रहरी वृत्तमा राखेर घटनाबारे सोधपुछ तथा अनुसन्धान भइरहेको प्रहरीले जनाएको छ।
बिहीबार दिउँसो करिब १:३० बजे राहदानी विभागअगाडि गणेश नेपालीले आफ्नै शरीरमा पेट्रोल छर्केर आगो लगाएका थिए। गम्भीर घाइते भएका उनलाई तत्काल उद्धार गरी वीर अस्पतालमा भर्ना गरिएको थियो। उपचारकै क्रममा शुक्रबार उनको निधन भएको हो।
प्रारम्भिक जानकारीअनुसार, घटनाअघि राहदानी विभागअगाडि पार्किङ गरिएको नेपालीको मोटरसाइकलमा काठमाडौं महानगरपालिकाका नगर प्रहरीले ह्विल लक लगाएका थिए। त्यसपछि उत्पन्न घटनाक्रमको अनुसन्धानका क्रममा सम्बन्धित तीन नगर प्रहरीलाई नियन्त्रणमा लिएर आवश्यक अनुसन्धान अघि बढाइएको प्रहरीले जनाएको छ।
