काठमाडौं । पूर्वराजा ज्ञानेन्द्र शाहले आफ्नो ८०औँ जन्मदिनको अवसरमा परिवारका सदस्यहरूसहित काठमाडौंको उत्तरी भेगस्थित शिवपुरी क्षेत्रमा पुगेका छन्। उनी हालै सञ्चालनमा आएको शिवपुरीस्थित सोल्टी समूहद्वारा सञ्चालित रिसोर्टमा केही दिन बस्ने कार्यक्रमसहित पुगेको उच्च स्रोतले जनाएको छ।
स्रोतका अनुसार पूर्वराजा १९ गते बिहान परिवारका सदस्यहरूसहित शिवपुरी पुगेका हुन्। जन्मदिन पारिवारिक वातावरणमै मनाउने तयारी गरिएको छ भने त्यसपछि पनि केही दिन सोही रिसोर्टमा बस्ने कार्यक्रम रहेको बताइएको छ।
पूर्वराजासँग निजी सचिव राजीव शाही, डा. सागर तिमल्सिना, फणिराज पाठक, सशस्त्र प्रहरीका एक डीएसपीसहित निजी सुरक्षा टोली पनि रहेको बताइएको छ। परिवार र निकट आफन्त गरी करिब २५ जनाको समूहले रिसोर्टका कोठा बुक गरेको स्रोतले जनाएको छ।
जन्मोत्सवमा पूर्वरानी कोमल शाह, छोरा पारस शाह, बुहारी हिमानी शाह, छोरी प्रेरणा सिंह, नाति हृदयेन्द्र शाह, नातिनी पूर्णिका र कीर्तिका तथा परिवारका अन्य सदस्य र आफन्तहरूको मात्र सहभागिता रहेको छ ।
फाेटाेःThe Royal Family Nepal फेस्बुक पेजबाट
