काठमाडौं । अखिल नेपाल फुटबल संघ (एन्फा) का अध्यक्ष पंकजविक्रम नेम्वाङ र महासचिव किरण राई विश्वकप फुटबल अवलोकनका लागि विदेश प्रस्थान गर्ने क्रममा त्रिभुवन अन्तर्राष्ट्रिय विमानस्थलबाटै रोकिएका छन्।
उनीहरू विश्वकप फुटबल प्रतियोगिता हेर्न अमेरिका हुँदै मेक्सिको जाने तयारीमा मंगलबार बिहान विमानस्थल पुगेका थिए। तर अध्यागमन कार्यालयले उनीहरूलाई विदेश यात्रा गर्न अनुमति नदिई फर्काएको जनाएको छ।
अध्यागमन विभागका अनुसार युवा तथा खेलकुद मन्त्रालय र राष्ट्रिय खेलकुद परिषद् (राखेप) बाट प्राप्त पत्रका आधारमा एन्फाका पदाधिकारीहरूको विदेश भ्रमणमा रोक लगाइएको हो। सोही निर्देशनअनुसार नेम्वाङ र राईलाई देश बाहिर जान नदिइएको विभागले स्पष्ट पारेको छ।
राखेपले हाल एन्फाको आर्थिक कारोबार तथा वित्तीय विषयसँग सम्बन्धित विभिन्न पक्षको छानबिन गरिरहेको छ। छानबिन प्रक्रिया नसकिएसम्म अध्यक्ष नेम्वाङ, महासचिव राईसहित एन्फाका पदाधिकारीहरूलाई विदेश यात्रा नगर्न निर्देशन दिइएको बताइएको छ।
यस घटनासँगै एन्फाभित्र चलिरहेको आर्थिक अनियमिततासम्बन्धी अनुसन्धान र त्यसका प्रभावहरू फेरि चर्चामा आएका छन्। छानबिन प्रक्रिया अगाडि बढिरहेका बेला एन्फाका शीर्ष पदाधिकारीहरू विदेश जानबाट रोकिएका हुन्।
