काठमाडौँ । त्रिभुवन विश्वविद्यालयबाट अध्ययन बिदा लिएर तोकिएको समयपछि सेवामा नफर्किएका प्राध्यापकहरूबाट हालसम्म १० करोड ४६ लाख रुपैयाँभन्दा बढी रकम फिर्ता भएको छ।
शिक्षा तथा खेलकुद मन्त्रालयका सहकुलपति समेत रहेका मन्त्री सस्मित पोखरेलका अनुसार उच्च शिक्षामा सुशासन, जवाफदेहिता र संस्थागत अनुशासन कायम गर्ने अभियानअन्तर्गत यो रकम असुल गरिएको हो।
उनका अनुसार मन्त्रालय र त्रिभुवन विश्वविद्यालयको समन्वयमा गरिएको पहलपछि अध्ययन बिदा लिएर फर्किनुपर्ने दायित्व पूरा नगर्ने प्राध्यापकहरूबाट रकम फिर्ता गर्ने प्रक्रिया अघि बढाइएको छ र अझै केही प्राध्यापकहरू पनि रकम फिर्ता गर्ने चरणमा छन्।
मन्त्री पोखरेलले अध्ययन बिदा विश्वविद्यालयले दक्ष, अनुसन्धानमुखी तथा अन्तर्राष्ट्रिय स्तरको जनशक्ति उत्पादन गर्न प्रदान गर्ने विशेष अवसर भए पनि त्यसको दुरुपयोग हुँदा राज्यको लगानी खेर जाने र विश्वविद्यालयलाई आर्थिक, शैक्षिक तथा नैतिक क्षति पुग्ने बताएका छन्।
