काठमाडौँ । नेकपा एमालेका सचिव महेश बस्नेतले माइतीघर क्षेत्रमा भएको एक घटनाप्रति गम्भीर आपत्ति जनाएका छन्।
सामाजिक सञ्जालमार्फत उनले आफ्नो परिवारमाथि साइबर अपराध भएको भन्दै उजुरी दिन साइबर ब्युरो जाने क्रममा अप्रिय घटना भएको उल्लेख गरेका छन्।
बस्नेतका अनुसार माइतीघर क्षेत्रमा भएको भिडभाड हेर्दै गर्दा त्यहाँ उपस्थित केही व्यक्तिहरूले उनकी श्रीमतीसहित केही महिलामाथि गालीगलौज गर्नुका साथै हातपात समेत गरेका थिए। उनले उल्टै आफ्नी श्रीमतीसहित आठ जनालाई प्रहरीले पक्राउ गरेकोप्रति असन्तुष्टि जनाएका छन्।
उक्त घटनालाई केही सञ्चार माध्यमहरूले गलत ढंगले प्रस्तुत गर्दै भ्रामक प्रचार गरिएको आरोप लगाउँदै बस्नेतले यसप्रति दुःख व्यक्त गरेका छन्। उनले माइतीघर मण्डला जस्तो सार्वजनिक स्थललाई मन नपरेका व्यक्तिलाई बदनाम गर्ने तथा चरित्र हत्या गर्ने थलोका रूपमा प्रयोग गरिनु निन्दनीय भएको टिप्पणी गरेका छन्।
बस्नेतले यस्ता संवेदनशील विषयमा सरकार मौन बस्नु उपयुक्त नहुने बताउँदै पीडित आफैंले न्याय खोज्नुपर्ने अवस्था सिर्जना हुनु, उनीहरूमाथि हातपात हुनु र उल्टै पक्राउ गरिनु लोकतान्त्रिक समाजका लागि राम्रो संकेत नभएको बताएका छन्।
घटनाबारे सम्बन्धित निकायले निष्पक्ष छानबिन गरी दोषीमाथि कारबाही गर्नुपर्ने माग गर्दै उनले अन्यथा सशक्त प्रतिरोध गरिने चेतावनी समेत दिएका छन्।
