काठमाडौं । नेकपा (एमाले)का नेता गोकुल बास्कोटा ले अमेरिका र ईरानबीच बढ्दो तनावका सन्दर्भमा सामाजिक सञ्जालमार्फत टिप्पणी गरेका छन्।
उनले पछिल्लो समय अन्तर्राष्ट्रिय स्तरमा देखिएको द्वन्द्वको सम्भावना र आपसी धम्कीपूर्ण अभिव्यक्तिबारे प्रश्न उठाउँदै त्यस्ता परिस्थितिमा कुन पक्षलाई विश्वास गर्ने भन्ने अन्योल बढेको उल्लेख गरेका छन्। बास्कोटाले नेपाललाई शान्तिपूर्ण राष्ट्रका रूपमा प्रस्तुत गर्दै ‘बुद्धको देश’को पहिचानलाई अझ मजबुत बनाउनुपर्ने धारणा व्यक्त गरेका छन्।
उनका अनुसार नेपाल कुनै पनि अन्तर्राष्ट्रिय द्वन्द्वबाट टाढा रहनुपर्ने देश भएकाले ‘बफर जोन’ जस्तै भूमिका उपयुक्त हुनसक्ने संकेत गरिएको छ। साथै, उनले विगतमा राजा वीरेन्द्र ले अघि सारेको ‘शान्ति क्षेत्र’को अवधारणालाई समेत स्मरण गर्दै वर्तमान सन्दर्भमा त्यस्तो दृष्टिकोण अझ सान्दर्भिक हुनसक्ने उल्लेख गरेका छन्।
बास्कोटाले सामाजिक सञ्जालमार्फत व्यक्त गरेको यो धारणा अहिले विभिन्न कोणबाट चर्चा भइरहेको छ।
