काठमाडौँ:अत्यासलाग्दो बर्ष २०८२ पार गरेर हामी नेपाली पात्रो अनुसारको नयाँ बर्ष २०८३ लाई स्वागत गर्ने तयारीमा छौँ । यो नयाँबर्षले मुलुक र मुलुकबासीले बर्ष २०८२ मा ब्यहोरेको भय र त्रासलाई दुर गर्दै देश विकास र सम्भावनाका नयाँ गोरेटो र भरोसाहरुको भर दिन सकोस् भन्ने कामना गर्दछौँ ।
बर्ष २०८२ नेपाल र नेपालीका लागि एक प्रकारको अत्यासलाग्दो र बडो त्रासदीपूर्ण बर्षका रुपमा रह्यो । खासमा गत भदौमा भएको जेनजी आन्दोलनका कारण उत्पन्न परिस्थितिले हामी नेपालीलाई एक प्रकारको त्रासदी दियो । मुलुकको प्रमुख प्रशासनिक केन्द्र सिंहदरबार जहाँ प्रधानमन्त्रीको कार्यालयदेखि लिएर सबैजसो मन्त्रालयहरु छन् । सिंहदरबारको परिसरमै सर्वाेच्च अदालत पनि छ । ती सम्पदामाथिको आगजनी एवं देशव्यापी रुपमा चलेको आन्दोलनका कारण उत्पन्न ध्वंसात्मक परिस्थितिले मुलकु र मुलुकबासीलाई नै भदौको अन्तिम साता नेपालीका मनमनमा त्रास मात्र थपिदियो ।
भदौ २३ गतेका दिन नेपालका युवायुवतीहरुले गरेको शान्तिपूर्ण आन्दोलनमा हिंसा भड्किन पुग्यो र त्यसबाट त्यसैदिन कम्तीमा १९ जना बालबालिकाको ज्यान गयो । त्यो दुर्घटना यो बर्षको बिर्सन लायक घटना थियो । प्रहरीको गोलीबाट यतिका धेरै नागरिकको ज्यान गएपछि भड्किएको हिंसाले नै देशैभरि हिंसा मच्चायो र देशको राजनीतिक मात्र नभएर भौतिक संरचनामा नै फेरबदल ल्याइदियो ।
एकातर्फ देशका यी महत्वपूर्ण संरचना जलेका थिए भने अर्कातर्फ देशभरका जेलहरुबाट कम्तीमा पनि १० हजार कैदी बन्दीहरु भागेर मानिसमा त्रास फैलाएको थियो । नेपालले धेरै ठूला कष्ट र प्राकृतिक प्रकोपहरु व्यहोरेको छ । केही बर्ष अघि विश्वले नै भोगेको कोभिड १९ को त्रासदी ब्यहोर्यो भने आजभन्दा १० बर्षअघि मात्र भूकम्पको त्रासदी पनि भोग्यो । यी सब खालका प्राकृतिक प्रकोप ब्यहोरेको नेपालले गत भदौको मानव निर्मित प्रकोप सहन निकै कठिन भयो । आफ्नै आँखा अगाडि दनदनी बलेका राष्ट्रिय संरचना र सम्पदाहरु देखेर मन थाम्न नसकेका अवस्थाबाट पार पाउन नेपाली नागरिकले निकै धैर्यता साँध्नुपर्यो । बर्ष २०८२ को सबैभन्दा त्रासदीपूर्ण घटना नै त्यही थियो, जुन जनता र देशको संरचनाले सँगसँगै भोग्यो, देख्यो ।
यो त्रासदीका बीचमा पनि तोकिएकै समयमा निर्वाचन सम्पन्न भयो र नयाँ नयाँ सरकार पनि बन्यो । नयाँ सरकार नयाँ पुस्ताको नेतृत्वमा बनेपछि भने अहिले विगतमा नेपाली मनमा लुकिबसेका त्रासदीहरु मेटिने आशा पलाएको छ । मुलुकको संसद यति धेरै युवा पुस्ताका नागरिकबाट बनेको र सरकार पनि युवाहरुकै बाहुल्यता मात्र होइन कि युवाहरुकै संरचनामा निर्माण भएकाले अबका दिन सुनौला होलान् कि भन्ने भरोसा जनताले गरेका छन् ।
विगतमा पुराना र ठूला भनिएका राजनीतिक दलहरुकै लिँडेढिपी र युवा पुस्ता र समूहलाई नगन्ने गरेका गल्तीहरुबाट उत्पन्न परिस्थितिले ल्याएको आगजनीबाट बनेको खरानीबाट यो नयाँ पुस्ता उठ्ला र युवा बाहुल्यताको यो सरकारले देशलाई समय र युगअनुरुप अघि बढाउन सक्ला भन्ने अपेक्षामा नेपाली जनता रहेका छन् । त्यसैले नयाँ बर्ष २०८३ ले नेपालीहरुको जीवनमा नयाँ उत्साह, उमंग र आशाको सन्देश बोकेर आओस् भन्ने अपेक्षा गर्दछौँ ।
हरेक वर्षको जस्तै यस वर्षको सुरुवात पनि हामी सबैका लागि नयाँ संकल्प, नयाँ लक्ष्य र नयाँ सम्भावनाहरूको ढोका खोल्ने अवसर हो । विगतका अनुभवहरूबाट सिक्दै, सफलताहरूलाई सम्झँदै र असफलताहरूबाट पाठ सिक्दै नयाँ रूप र स्वरुपमा ग्रहण गर्दै हामी नयाँ वर्षलाई स्वागत गर्न तयार भएका छौँ ।
त्यसैले पनि लाग्छ, नयाँ वर्ष केवल पात्रो परिवर्तन मात्र नभएर आत्ममूल्यांकन गर्ने, आफ्ना कमजोरीहरू सुधार गर्ने र जीवनलाई सकारात्मक दिशामा अघि बढाउने समय पनि हो भन्ने स्वरुपमा लिनु पर्दछ । यस पावन अवसरमा पुराना दुःख, निराशा र नकारात्मक सोचलाई बिर्सेर नयाँ सोच, ऊर्जा र आशाका साथ अघि बढ्ने र परिवार, समाज र राष्ट्रप्रति हाम्रो जिम्मेवारीलाई थप संवेदनशील र जिम्मेवार रुपमा महसुस गर्ने अवसरका रुपमा लिनुपर्दछ ।
नयाँ वर्ष २०८३ ले नेपाली जनताको जीवनमा सुख, शान्ति, समृद्धि र सफलता ल्याओस् र नयाँ बर्षका हरेक दिनलाई अर्थपूर्ण रुपमा आफ्नो लक्ष्यतर्फ अघि बढाउन सकौँ । यिनै आशा र उत्साहका साथ नयाँवर्ष २०८३ को हाम्रा सबै शुभचिन्तक तथा पाठक बर्गमा हार्दिक शुभकामना व्यक्त गर्दछौँ ।
