काठमाडौं। बालिकाहरूको प्रतिभा प्रस्तुति र व्यक्तित्व विकासलाई प्रोत्साहन गर्ने उद्देश्यले सिजन मिडियाले आयोजना गर्दै आएको ‘जुनियर स्कूल प्रिन्सेस–२०२६’ को ११औँ संस्करण अन्तर्गत पहिलो अडिसन सम्पन्न भएको छ।
अडिसनबाट २० जना छात्रा प्रतियोगीहरू छनोट भएका छन्। वार्षिक परीक्षा पश्चात फुर्सदमा रहेका बालिकाहरूको क्षमता अभिवृद्धि गर्ने लक्ष्यसहित विगत १६ वर्षदेखि निरन्तर आयोजना हुँदै आएको यस प्रतियोगितामा सहभागी बालिकाहरूले विभिन्न विधामा आफ्नो प्रतिभा प्रस्तुत गरेका थिए।
अडिसनमा निर्णायकको भूमिकामा एसइई प्रिन्सेसका विजेताहरू प्राश्ना श्रेष्ठ, प्राप्ती श्रेष्ठ र शुभ केसी रहेका थिए। आयोजक संस्था सिजन मिडियाकी कार्यक्रम निर्देशक रेजिना तुलाधरका अनुसार प्रतियोगिताको अन्तिम अडिसन चैत २५ गते आयोजना गरिनेछ।
छनोट भएका प्रतियोगीहरूलाई तीन सातासम्म विभिन्न विज्ञद्वारा बालमैत्री प्रशिक्षण प्रदान गरिनेछ। प्रशिक्षण अवधिमा उनीहरूलाई चन्द्रागिरी हिल्स, भक्तपुर दरबार क्षेत्र, छाउनी संग्रहालय, गोदावरी वनस्पति उद्यान, जाउलाखेल चिडियाखाना, नारायणहिटी दरबार संग्रहालय लगायतका स्थलहरूको शैक्षिक भ्रमण गराइने कार्यक्रम रहेको छ। साथै, अपाङ्ग बाल आश्रम र वृद्धाश्रम भ्रमणसँगै नेपाली चलचित्र अवलोकन पनि गराइनेछ।
प्रतियोगिताका क्रममा आन्तरिक रूपमा खेलकुद तथा अन्य विभिन्न प्रतिस्पर्धात्मक कार्यक्रमहरू पनि सञ्चालन गरिनेछन्। कार्यक्रमको कोरियोग्राफी रोजिन शाक्यले गर्नेछन्।
जुनियर स्कूल प्रिन्सेस–२०२६ को फाइनल प्रतियोगिता २०८३ साल बैशाख ११ गते राष्ट्रिय नाचघर, जमलमा आयोजना गरिनेछ।
