काठमाडौं । अनेरास्ववियुले नेकपा (एमाले)का अध्यक्ष तथा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकमाथि गरिएको धरपकडप्रति गम्भीर आपत्ति जनाएको छ।
संगठनले जारी गरेको विज्ञप्तिमा अनेरास्ववियु सधैं राष्ट्र, राष्ट्रियता, लोकतन्त्र तथा कानुनी राज्यको पक्षमा दृढतापूर्वक उभिँदै आएको उल्लेख गर्दै हालैको घटनाले विधिशास्त्रका न्यूनतम मान्यता र कानुनी राज्यको मर्ममाथि प्रश्न उठाएको जनाएको छ।
विज्ञप्तिमा कानुनी रूपमा पुष्टि हुन नसक्ने आधारमा सरकार गठन भएको चौबीस घण्टा नबित्दै पूर्वाग्रही ढङ्गबाट गरिएको धरपकडले वर्तमान सरकारको नियतमाथि समेत शंका उत्पन्न गरेको उल्लेख गरिएको छ।
लोकतान्त्रिक आन्दोलनमा जीवन समर्पण गरेका नेतामाथि यस्तो व्यवहार गरिएको भन्दै संगठनले उक्त कदमको घोर भर्त्सना गरेको छ।
अनेरास्ववियुले नेपाल सरकार तथा सम्बन्धित निकायसमक्ष ओली र लेखकको अविलम्ब रिहाइको माग गर्दै यसलाई गैरकानुनी कार्यको संज्ञा दिएको छ।
साथै, संगठनले देशभरिका आफ्ना मातहत कमिटीहरूलाई यस कदमको सशक्त प्रतिकार गर्न निर्देशन दिएको जनाएको छ।
