काठमाडौं । नेकपा एमालेका अध्यक्ष केपी शर्मा ओलीले हालै सम्पन्न निर्वाचनको परिणामलाई ‘अनपेक्षित, अस्वाभाविक, अनपत्यारिलो र जादुमय’ भएको टिप्पणी गर्नुभएको छ ।
नवनिर्वाचित प्रतिनिधि सभा तथा राष्ट्रिय सभाका सदस्यहरूसँगको भेटघाट कार्यक्रममा बोल्दै अध्यक्ष ओलीले निर्वाचन प्रक्रिया र नतिजाबारे आफ्नो असन्तुष्टि व्यक्त गर्नुभएको हो । उहाँले ‘समृद्ध नेपाल, सुखी नेपाली’ भन्ने राष्ट्रिय गन्तव्यप्रति विरोधी शक्तिहरूले रुचि नदेखाएको आरोप लगाउनुभयो ।
ओलीका अनुसार देशमा शान्ति, सुव्यवस्था र न्यायपूर्ण समाज स्थापना हुन नचाहने तत्वहरूले ‘घृणाको राजनीति’ लाई बढावा दिएका छन् । उहाँले राजनीतिलाई घृणाद्वारा प्रभावित गर्ने प्रयास भइरहेको र त्यसमा विभिन्न पक्षबाट सहयोग पुगेको दाबी गर्नुभयो ।
साथै, उहाँले पार्टी पंक्तिलाई यस्ता प्रवृत्तिविरुद्ध दृढतापूर्वक उभिन र जनतासम्म सत्य तथ्य पुर्याउन सक्रिय हुन निर्देशन दिनुभयो । विशेषगरी सामाजिक सञ्जालमा हुने आलोचना र हमलाको प्रतिवाद गर्न कार्यकर्ताहरूमा देखिएको निष्क्रियताप्रति उहाँले चिन्ता व्यक्त गर्नुभयो ।
“हामी आफैँ बोल्न तयार छैनौँ भने सत्य कुरा जनतासम्म कसरी पुग्छ ? गलत र भ्रमको खण्डन गर्न हामी आफैँ अग्रसर हुनुपर्छ,” उहाँले भन्नुभयो ।
अध्यक्ष ओलीले सांसदहरूलाई अध्ययनशील, अनुशासित र जिम्मेवार भएर काम गर्न पनि आग्रह गर्नुभयो ।
