काठमाडाैँ । प्रतिनिधिसभा सदस्य निर्वाचनअन्तर्गत जुम्लाबाट राष्ट्रिय प्रजातन्त्र पार्टी (राप्रपा)का उमेदवार ज्ञानबहादुर शाही विजयी भएका छन्। यससँगै राप्रपाले यस पटकको निर्वाचनमा जितको खाता खोलेको छ।
शनिबार फागुन २३ गते दिउँसो सार्वजनिक गरिएको अन्तिम मत परिणामअनुसार शाहीले निकटतम प्रतिस्पर्धी नरेश भण्डारी लाई दुई हजार ९४२ मतान्तरले पराजित गरेका हुन्। शाहीले कुल १४ हजार ६५ मत प्राप्त गर्दा भण्डारीले ११ हजार १२३ मत पाएको निर्वाचन अधिकृतको कार्यालयले जनाएको छ।
निर्वाचनमा दीपबहादुर शाही ६ हजार ६६४ मतसहित तेस्रो स्थानमा रहेका छन्। त्यस्तै शान्तीलाल महत ४ हजार २८८ मत प्राप्त गर्दै चौथो स्थानमा सीमित भए।
यसैगरी राष्ट्रिय स्वतन्त्र पार्टीकी उमेदवार विनीता कठायतले ३९८ मत प्राप्त गरेकी छन्।
