काठमाडाैँ । महोत्तरीको कञ्चनवनमा मिथिला मध्यमा परिक्रमाको डोला आइपुगेको छ ।
फागुन शुक्ल प्रतिपदाबाट शुरु भएको यो ऐतिहासिक १५ दिने धार्मिक पदयात्रा सप्तमी तिथिमा कञ्चनवन पुगेपछि यहाँ परम्परागत रूपमा होली महोत्सव सुरू भएको हो । भगवान राम (मिथिला विहारी) र माता सीता (किशोरीजी) का प्रतिमा राखिएका डोलाहरू हजारौं श्रद्धालु, साधुसन्त तथा महात्माहरूको लावालस्करसहित कञ्चनवन आइपुगेका हुन् ।
जनविश्वासअनुसार त्रेता युगमा भगवान राम र सीताले यो कञ्चनवनमै रङ अबिर दलेर होली खेलेका थिए । सोही सम्झनामा डोला यहाँ पुगेपछि परिक्रमा सहभागीहरूले एकअर्कालाई रङ अबिर लगाएर होली खेल्ने परम्परा छ । यो वर्ष पनि कञ्चनवनमा डोला बिसाइएपछि भक्तजनहरूले दर्शन, पूजाआराधना तथा अबिर चढाएका छन् ।
संस्कृतिविदहरूका अनुसार कञ्चनवनको यो होली मिथिलाञ्चलको सबैभन्दा पुरानो र विशेष होली उत्सव मानिन्छ । यहाँ मठमन्दिरका महन्थहरू, सामाजिक अगुवा, सांस्कृतिक तथा राजनीतिक व्यक्तित्वहरूको पनि उल्लेख्य सहभागिता हुने गरेको छ ।
परिक्रमा यात्रा धनुषाको हनुमानगढीबाट शुरु भएर भारतको कल्याणेश्वर, गिरिजास्थान हुँदै महोत्तरीको मटिहानी, जलेश्वर, मडै, ध्रुवकुण्ड पुगेपछि कञ्चनवन आइपुगेको हो । कञ्चनवनमा होली खेलेपछि यात्रा धनुषाको पर्वता, धनुषाधाम, सतोषर, औरही हुँदै पुनः जनकपुरधाम फर्केर फागुन पूर्णिमामा समापन हुन्छ ।
