इङलिस प्रिमियर लिग अन्तर्गत गएराति भएको खेलमा म्यान्चेस्टर युनाइटेड र वेस्टह्याम बिचको खेल १–१ गोलको बराबरीमा सकिएको छ ।
लन्डन स्टेडियममा भएको यस खेलमा हार नजिक पुगेको म्यान्चेस्टरका लागि दोस्रो हाफको इन्जुरी समयमा बेन्जामिन सेस्कोले गोल गरेर युनाइटेडलाई हारबाट जोगाएका थिए । डिबक्स बाहिरबाट ब्रायन बुमोले दिएको पासलाई सेस्कोले सुन्दर ढंगबाट गोल गरेका थिए ।
युनाइटेडले पूरै खेल अवधिमा वेस्टह्याम बिरुद्ध निरन्तर आक्रमण गरे पनि वेस्टह्यामले पहिलो गोल गरेको थियो । वेस्टह्यामका लागि ५०औं मिनेटमा टोमस साउसेकले गोल गरेका थिए । यही बिच युनाइटेडका कासेमिरोले हेडर मार्फत गरेको गोल अफसाइड भएको थियो ।
विगत पाँच खेलमा चारमा विजयी रहेको युनाइटेड पाँचौं खेलमा बराबरीमा रोकियो । अंक तालिकामा युनाइटेड ४५ अंक सहित चौथो स्थानमा छ । यसअघिका खेलहरूमा म्यान्चेस्टर सिटी, अार्सनल, फुलह्याम र टोटेनह्यामलाइ हराएर उच्च मनोबलका साथ मैदानमा उत्रेको युनाइटेडले उत्कृष्ट खेल खेले पनि वेस्टह्यामसँग बराबरीमा चित्त बुझाउन बाध्य भयो ।
वेस्टह्याम भने २४ अंक सहित रेलिगेसन क्षेत्रमा छ ।
अंक तालिका
