झापा। अध्यक्ष केपी शर्मा ओलीलाई झापा क्षेत्र नम्बर–५ मा उम्मेदवारी दिनबाट वञ्चित गराउने उद्देश्यले राष्ट्रिय स्वतन्त्र पार्टी (रास्वपा)का कार्यकर्ताले आफ्ना कार्यकर्तामाथि सांघातिक आक्रमण गरेको भनि नेकपा (एमाले)ले खेद व्यक्त गरेको छ ।
नेकपा (एमाले) झापा क्षेत्र न ५ प्रतिनिधि सभा निर्वाचन क्षेत्रीय समन्वय कमिटीका संयोजक नारायण प्रसाद गौतमले मंगलबार साँझ एक विज्ञप्ति जारी गर्दै रास्वपाका कार्यकर्ताको व्यवहारले शान्तिपूर्ण र भयरहित चुनाव हुनेप्रति गम्भीर शंका व्यक्त गर्नुभएको छ ।
‘आगामी फागुन २१ गते संघीय निर्वाचनका निम्ति आज मंगलबार देशभर उल्लासमय रूपमा उम्मेदवारी मनोनयन भइरहेको बेला झापा क्षेत्र नम्बर ५, दमकमा दिउँसो राष्ट्रिय स्वतन्त्र पार्टी (रास्वपा)का कार्यकर्ताहरूद्वारा हाम्रो पार्टी नेकपा (एमाले)का नेता तथा कार्यकर्तामाथि भएको सांघातिक आक्रमणप्रति खेद व्यक्त गर्दछौँ’, विज्ञप्तिमा भनिएको छ– ‘निर्वाचन आयोगले सीमा तोकिदिएको स्थानलाई मिचेर हाम्रो पार्टीका श्रद्धेय अध्यक्ष तथा झापा क्षेत्र नम्बर ५ का उम्मेदवार कमरेड केपी शर्मा ओलीलाई निर्वाचन आयोगमा उम्मेदवारी दर्ता गर्न नदिने नियतले रास्वपाका कार्यकर्ताहरूद्वारा सांघातिक आक्रमण गरिएको छ। सांघातिक आक्रमणबाट तीन जना कमरेडहरु घाइते हुनुभएको छ । उहाँहरुको शिघ्र स्वास्थ्य लाभको कामना गर्दछौँ ।’
‘जेनजी उपद्रवबाट लुटिएका सुरक्षाकर्मीहरुको सयौं हातहतियार बाहिरै रहेको, अपराधिक पृष्ठभूमिका कैदीबन्दीहरू बाहिर रहेको बेला हाम्रो पार्टीले भयरहित, शान्तिपूर्ण रुपमा चुनाव हुनेप्रति शंका गरिरहेको छ।
दमकमा आज रास्वपाका कार्यकर्ताहरुको हर्कतबाट त्यो शंकालाई थप पुष्टि गरेको छ । तसर्थ उत्पन्न परिस्थितिप्रति नेकपा (एमाले) सम्बन्धित निकायको गम्भीर ध्यानाकर्षण गराउन चाहन्छ’, गौतमद्वारा जारी विज्ञप्तिमा भनिएको छ– ‘सांघातिक आक्रमणसँगै दुई जना कमरेडहरुको सुनको सिक्रीसमेत लुटिएको छ ।’
नेकपा (एमाले) जिम्मेवार पार्टी भएको नाताले हाम्रा नेता तथा कार्यकर्ता संयममित ढंगबाट चुनावी माहोलमा होमिएका छन् । हाम्रो पार्टीको संयमतालाई कमजोरीका रुपमा लिइन्छ भने भोली जुनसुकै परिस्थिति सृजना उत्पन्न हुन सक्ने र परिस्थितिको जिम्मेवार स्वयं रास्वपा र सरकार हुने पूर्वसचेत गराएको विज्ञप्तिमा उल्लेख छ । समाजमा अराजकता सृजना गर्ने जो कोहीलाई कानुनी दायरामा लिई कार्वाही गर्न सरकारसँग पार्टीले माग गरेको छ ।
