काठमाडौं । कोरोना भाइरस नियन्त्रणका लागि सरकारले चीनसँग जोडिएका सीमामा कडाई गर्न थालेको छ । चीनबाट आउने पर्यटकबाट सो भाइरस नेपाल आउने सम्भावना बलियो भएपछि दुई वटा नाका नै बन्द गरेको छ । चीनमा कोरोना भाइरसको संक्रमण बढेपछि तातोपानी र रसुवागढी नाकाबाट नेपाल आउने पर्यटकलाई रोक लगाइएको हो । दुवै देशको आपसी सहमतिमा रोक लगाइएको गृहमन्त्रालयले जानकारी दिएको छ । गृह मन्त्रालयका प्रवक्ता केदारनाथ शर्माका अनुसार १५ दिनका लागि रोक लगाइएको हो ।
उनका अनुसार सो क्षेत्रबाट नेपालबाट चीनतर्फ जाने नेपाली नागरिकका हकमा पनि यो व्यवस्था लागू हुनेछ । शर्माले भने,‘चीनतर्फ ल्होसार पर्व पनि रहेछ । सडकको अवस्था पनि राम्रो छैन । कोरोनाको संक्रमणको जोखिम पनि छ । त्यसैले केही समयका लागि आवतजावत रोक्न सहमत भएका हौँ ।’ यसैगरी सरकारले पूर्वी सीमाबाट आवतजावत गर्नेहरूका लागि भारत र नेपाल दुवैतर्फ निगरानी र परामर्श सुरु गरेको छ ।
भारतले नेपालबाट आउने व्यक्तिलाई चीनबाट फैलिएको कोरोना भाइरसको संक्रमणका लागि छानबिन गर्न सुरु गरेपछि नेपालतर्फ पनि परामर्श कक्ष राखिएको हो । कोरोना भाइरसको लक्षण पाइए त्यस्ता व्यक्तिलाई थप परीक्षणका लागि नजिकैको अस्पतालको लग्ने व्यवस्था गरिएको दुवै देशका अधिकारीहरूले बताएका छन् । भारतले पश्चिम बंगालको दार्जिलिङ, नेपालको सीमा र बागडोग्रा विमानस्थलमा गरी चारवटा ‘स्क्रिनिङ क्याम्प’ खडा गरेको छ । सौर्य दैनिकबाट
