चीनको हुबे प्रान्तबाट फैलिएको कोरोनाभाइरस अहिले युरोपमा केन्द्रित भएकाे छ । खासगरी बृद्धबृद्धाको बढी जनसंख्या रहेको इटाली र स्पेनमा कोरोनाबाट मृत्यु हुनेको संख्या घट्नुको साटो अझ बढ्दैछ । विश्वभर कोरोनाभाइरसका कारण १८ हजार २५० जनाको मृत्यु भएको छ ।
विश्व स्वास्थ्य संगठनका अनुसार मंगलबार इटालीमा ७४३ जनाको मृत्यु भएको छ । योसँगै इटालीमा मात्र मृतकको संख्या ६ हजार ८२० पुगेको छ । संक्रमितको संख्या पनि करिब ६९ हजार पुगेको छ ।
युरोपकै अर्को मुलुक स्पेनमा मंगलबार थप ४४९ जनाको मृत्यु भएको छ, र यहाँ मृतकको कूल संख्या २ हजार ८०० पुगेको छ । यहाँ करिब ३९ हजार मानिस संक्रमित छन् । युरोपकै फ्रान्समा ८६० जना, बेलायतमा ४२२ जना, नेदरल्यान्डसमा २७६ जना, स्वीट्जरल्यान्डमा १२२ जना, जर्मनीमा १४९ जना, बेल्जियममा १२२ जनाको मृत्यु भइसकेको छ ।
युरोपका अरू सबैजसो मुलुकमा कोरोनाबाट मानिसको मृत्यु हुनुका साथै संक्रमितको संख्या लगातार बढ्दै गएको तथ्याँक सार्वजनिक भएका छन् ।
अर्कोतर्फ इरानमा १ हजार ९३४ जनाको मृत्यु भएको छ भने अमेरिकामा ६२२ जना तथा क्यानडामा २४ जनाको मृत्यु भएको छ ।
चीनमा भने सोमबार अस्पतालमा उपचारारत ७ जना सहित कूल ३ हजार २७७ जनाको मृत्यु भइसकेको छ ।