काठमाडौं । नेकपा एमालेको एघारौं महाधिवेशन मंसिर अन्तिम साता हुने भएको छ । आइतबार बसेको केन्द्रीय सचिवालय बैठकले मंसिर अन्तिम साता महाधिवेशन गर्ने निर्णय गरेको हो।
बैठक पछि उपमहासचिव प्रदीप ज्ञवालीले एघारौं महाधिवेशन मंसिरको अन्तिम साता आयोजना हुने जानकारी दिनुभयो ।
ज्ञवालीले महाधिवेशन स्थान र मितिको टुंगो भने केन्द्रीय कमिटी बैठकबाट हुने जानकारी दिनुभयो । बैठकले संसद् पुनस्थापना लागि नेतृत्व लिने र अहिले भएको प्रतिगमनविरुद्ध एकजुट हुने निर्णय समेत गरेको छ।
नेता ज्ञवालीले सरकार असंवैधानिक तरिकाले बनेको र चुनावको कुनै वातावरण नभएको बताउनु भयो ।
उहाँले भन्नुभयो ‘सरकार चुनाव गराउने बाटोमा छैन, सरकार चुनावका लागि तयारी नै छैन । प्रहरी चौकी लुट्नेहरूलाई कारबाही भएन, जेल तोडेर कैदीहरू बाहिर बसेका छन् । चौकीहरू पुनस्थापना भएको छैन, कसरी चुनाव हुनसक्छ ? चुनावको पूर्वतयारी नै भएको छैन, दलहरूलाई धम्काएर निर्वाचन कसरी हुन्छ ? निर्वाचनको आत्मा मरिरहेको छ कसरी हुन्छ चुनाव ? अहिलेका गतिविधि चुनाव लक्षित छैन ।’
नेता ज्ञवालीले संसद् पुन: स्थापनाबाट नै अहिलेको समस्याको निकास दिने बताउनु भयो ।
