काठमाडौं । नेपालीहरुको सबैभन्दा ठूलो चाड दशैं सुरु भएसँगै देशभर उत्सवको माहोल छाएको छ ।
राजधानीदेखि गाउँ–बस्तीसम्म आँगनमा जमरा उमारिएका छन्, परिवार मिलनका तयारी तिव्र छन्, र बजारमा चहलपहल बढेको छ ।
दशैंलाई नेपालीहरूले मात्र धार्मिक पर्वका रूपमा होइन, परिवार भेटघाट, आस्थाको प्रतीक र संस्कृतिको धरोहरका रूपमा मनाउँछन् ।
गाउँका बालबालिकाले बाँसको ठूलो पिङमा उफ्रिँदै दशैंको मजा लिनथालेका छन् । घर रंग रोगन गर्ने चटारो देखी बाटो घाटो सामुहिक रुपमा सफाईको रौनक छुट्टै छ ।
नवदुर्गा पूजासँगै सुरु हुने दशैं नवमीका दिन देवी मन्दिरहरूमा घण्टीको आवाज गुञ्जिन्छ । श्रद्धालुहरूले बलिपूजा, फूल–माला चढाउँदै आशिर्वाद मागिरहेका देखिन्छन् ।
दशैंलाई धेरैले “घर फर्किने पर्व” पनि भन्छन् । विदेश वा शहरमा व्यस्त जीवन बिताउनेहरू यस अवसरमा आफ्ना गाउँ फर्किन्छन् । आँगनमा अँगालोमा भेट हुँदा उम्किने आँसु र खुशी दशैंको संवेदनशील पक्ष हो ।
दशैंको परिवार र आफन्तसँग मिलेर खाने आत्मीयता र सम्बन्धलाई अझ गाढा बनाउने संस्कारका रूपमा चिन्निन्छ ।
फोटो पत्रकार मिथुन कुँवरले खिचेका दशैं झल्काउने केही तस्वीर ।
