एजेन्सी । बलिउड अभिनेत्री ऐश्वर्या राय बच्चनपछि उनका पति तथा अभिनेता अभिषेक बच्चनले पनि दिल्ली उच्च अदालतबाट राहत पाएका छन् ।
अदालतले अनलाइन प्लेटफर्महरूलाई अभिषेकको अनुमति बिना उनको नाम, तस्वीर र आवाज प्रयोग नगर्न आदेश दिएको छ । साथै, एआई प्रविधिबाट तयार पारिएका उनका फर्जी तस्वीर र भिडियो प्रयोग गर्न पनि अदालतले अस्थायी रोक लगाएको छ ।
यस मुद्दाको सुनुवाइ न्यायाधीश तेजस करियाले गरेका हुन् । सुनुवाइका क्रममा उनले अभिषेक बच्चनको तर्फबाट प्रस्तुत दलील र प्रमाणको अध्ययन गर्दा पहिलो नजरमै दावी बलियो देखिएको उल्लेख गर्दै, सम्भावित क्षति रोक्नका लागि एकपक्षीय अन्तरिम राहत दिनु उचित हुने बताएका थिए ।
अभिषेक बच्चनले १० सेप्टेम्बर, बुधबार अदालतमा याचिका दायर गरेका थिए । याचिकामा उनले आफ्ना पब्लिसिटी र पर्सनालिटी अधिकार (जनतामाझको छवि र व्यक्तित्व अधिकार) सुरक्षित गर्न माग गरेका थिए ।
साथै, वेबसाइट र अनलाइन प्लेटफर्महरूले उनको छवि, नाम, हस्ताक्षर र विशेषगरी यौन सामग्रीसँग जोडिएका फर्जी भिडियो प्रयोग नगर्न अनुरोध गरेका थिए । यसअघि मंगलबार उनकी पत्नी ऐश्वर्या राय बच्चनले पनि आफ्ना व्यक्तित्व अधिकारको सुरक्षाका लागि अदालतमा याचिका दायर गरेकी थिइन् ।
पहिलो सुनुवाइमा अभिषेकको पक्षबाट वकिल प्रविन आनन्दले अदालतलाई जानकारी दिँदै भने, “धेरै प्रतिवादीहरूले एआई प्रविधि प्रयोग गरेर नकली भिडियो र तस्वीर बनाइरहेका छन् । ती सामग्रीमा अभिषेक बच्चनको नाम, फोटो र नक्कली हस्ताक्षर समेत प्रयोग गरिएको छ ।”
अन्य कलाकारका पर्सनालिटी अधिकार
ऐश्वर्या र अभिषेक बच्चनअघि पनि अन्य बलिउड कलाकारहरूले आफ्ना छवि र व्यक्तित्व अधिकारको सुरक्षा माग्दै अदालत धाएका थिए । यसै वर्ष मे महिनामा अभिनेता ज्याकी श्रफले आफ्नो छवि र भिडियो परिवर्तन गरेर बिना अनुमति मर्चेन्टाइज बेचिएको भन्दै उजुरी दिएका थिए । त्यतिबेला अदालतले उनको पर्सनालिटी र पब्लिसिटी अधिकार सुरक्षित गरेको थियो ।
सन् २०२३ मा अदालतले अभिनेता अनिल कपूरको छवि, आवाज र “झकास” क्याचफ्रेजको दुरुपयोगमा रोक लगाएको थियो । त्यस्तै, सन् २०२२ नोभेम्बरमा अमिताभ बच्चनको व्यक्तित्व र पब्लिसिटी अधिकारको पनि अदालतले सुरक्षा प्रदान गरेको थियो ।
