स्याङ्जा। वालिङ नगरपालिका–५ मा शनिबार राति मोटरसाइकलको आवाजको विवादले कुटपिटमा परिणत भएको घटनामा प्रहरीले ८ जनालाई पक्राउ गरेको छ।
पक्राउ परेकामध्ये एकजना नाबालक रहेका छन्। घटनाको भोलिपल्ट आइतबार २ जना र त्यसपछि सोमबार ६ जना थप नियन्त्रणमा लिएका थिए।
प्रहरी नायब उपरीक्षक प्रशन्नराज चौधरीका अनुसार पक्राउ पर्नेहरूमा हरिनास गाउँपालिका–५ का ६ जना र चापाकोट नगरपालिका–५ का २ जना रहेका छन्। हरिनासबाट पक्राउ पर्नेमा २२ वर्षीय सिजन थापा, २० वर्षीय विवेक मानन्धर, २३ वर्षीय गुरुप्रसाद ‘गोरे’ लम्साल, १७ वर्षीय आर्यन क्षेत्री, २३ वर्षीय विश्वास वाग्ले र २२ वर्षीय निशान थापा रहेका छन्। चापाकोटबाट २४ वर्षीय अनिल शाही र १८ वर्षीय बादल विक पक्राउ परेका छन्।
शनिबार राति ११ बजे भलिबल प्रतियोगिता हेरेर फर्किरहेका युवाहरूले मोटरसाइकल चर्को आवाजमा चलाएको विषयमा ३२ वर्षीय ढालबहादुर थापासँग विवाद गर्दा उनलाई कुटपिट गरेका थिए। गम्भीर घाइते भएका थापालाई गण्डकी मेडिकल कलेज, पोखरामा उपचारको क्रममा मृत्यु भएको थियो।
प्रहरीका अनुसार सबै पक्राउ परेकालाई कर्तव्य ज्यान मुद्दामा १० दिन म्याद थप गरी अनुसन्धान अघि बढाइएको छ।
