काठमाडौं । ऐतिहासिक तथा सांस्कृतिक नगरी कीर्तिपुरमा रहेका सम्पदाहरुको प्रवद्र्धन गर्न नेपाल–युएस एलुम्नाइ नेटवर्क (नुसान) ले हेरिटेज वाक अर्थात् सम्पदा यात्रा आयोजना गरेको छ ।
नयाँ पुस्तालाई यहाँको सास्कृतिक महत्वबारे जानकारी दिन सम्पदा यात्रा गरिएको हो ।
यात्रामा नेपालबाट अमेरिकामा अध्ययन, तालिम तथा विभिन्न विषयगत अनुभव हासिल गरेका युवा प्रतिनिधिहरुको सहभागिता थियो ।
कीर्तिपुर नगरपालिकाको सहकार्यमा भएको उक्त कार्यक्रममा सहभागिहरुलाई नगरप्रमुख कृष्णमान डंगोलले स्वागत गरेका थिए ।
यात्रामा अमेरिकी सरकारको एक्सचेन्ज कार्यक्रमबाट लाभान्वित करिव ४५ जनाको सहभागिता थियो ।
कार्यक्रमले कीर्तिपुरको समृद्ध सांस्कृतिक इतिहास र सम्पदाको प्रवद्र्धन गर्ने उद्देश्य राखेको थियो। सहभागीहरूले वाघ भैरव मन्दिर, जोशी नानी, चिलञ्चो बिहार, देव पोखरी र उमामहेश्वर मन्दिर लगायत पाँचवटा प्रमुख स्थलको भ्रमण गरेका थिए । कार्यक्रममा नेपाल पर्यटन बोर्डका प्रमुख कार्यकारी अधिकृत दीपकराज जोशीले नेपालका सम्पदाहरूको प्रवद्र्धनमा यस्ता गतिविधिहरूले सृजनात्मक भूमिका खेल्ने बताए । उनले यो पदयात्रा नेपालको सम्पदालाई नयाँ ढंगले देखाउने सार्थक प्रयास रहेको उल्लेख गरे ।
कार्यक्रममा नेपालका लागि कार्यवाहक अमेरिकी राजदूत जेसन मिक्सको उपस्थिति रहेको थियो । उनले अमेरिकाको पूर्वविद्यार्थी सञ्जालमार्फत् दुई देशबीचको सम्बन्ध सुदृढ बनाउने काममा नुसानको भूमिका उल्लेखनीय रहेको बताउँदै जनस्तरको कूटनीति सुदृढ पार्न नुसान जस्ता सञ्जालहरू आवश्यक रहेको स्पष्ट पारे ।
विभिन्न सम्पदाहरुको अवलोकन पश्चात् समापन कार्यक्रममा कीर्तिपुर नगरपालिकाका प्रमुख कृष्ण मान डंगोलले कीर्तिपुरलाई खुला संग्रहालयको रूपमा विकास गर्ने लक्ष्य रहेको जानकारी दिए । आफुहरु नगरको सम्पदा संरक्षण र पर्यटन प्रवद्र्धनमा निरन्तर क्रियाशील रहँदै आएको र सरकार, संघसंस्था र स्थानीयवासीको समन्वयमा पर्यटनमार्फत स्थानीय अर्थतन्त्र सुदृढ पार्ने लक्ष्यमा स्थानीय सरकार रहेको बताए ।
कार्यक्रमको समापनमा नुसानकी अध्यक्ष प्रविणा अमात्यले सम्पदाप्रतिको सराहना नै संरक्षणको पहिलो पाइला भएको बताउँदै सहभागी सबैलाई धन्यवाद दिइन् । उनले हेरिटेज वाकले नेपालको इतिहास मात्र नभइ देशको पहिचानका लागि महत्वपूर्ण मानिने आधारस्तम्भ कायम भएको बताएकी थिइन । कार्यक्रममा परम्परागत सांस्कृतिक प्रस्तुति र समय बजीको परिकार समेत प्रस्तुत गरिएको थियो ।
