सिनामंगलस्थित काठमाडौं मेडिकल कलेज (केएमसी) शिक्षण अस्पतालका पाँच जनामा कोरोना संक्रमण प्रमाणित भएको छ । दुई चिकित्सक, एक नर्स र दुई बिरामी गरी पाँच जनामा कोरोना संक्रमण प्रमाणित भएको हो । ट्रेसिङ कार्य जारी रहेको र संक्रमित चिकित्सकको संख्या मंगलबारसम्म एक रहेकोमा बुधबार अर्का एक चिकित्सक पनि थपिएका छन् । मंगलबार ४ जना संक्रमित देखिएसँगै राति नै सूचना निकालेर अस्पताल बन्द गरिएको केएमसी मेडिकल कलेजका प्रमुख प्राडा चन्दा कार्कीले बताए ।
केएमसीले कोरोना विशेष अस्पताल दुवाकोट भक्तपुरमा स्थापना गरेको भए पनि सिनामंगलमा बिरामी, चिकित्सक र नर्समा कोरोना संक्रमण देखिएको छ । कोरोना पुष्टि भएका विभागहरूमा निर्मलीकरण गर्नुपर्ने भएकाले अस्पतालको सबै सेवा अर्को सूचना नआउन्जेलका लागि बन्द गरिएको अस्पतालले मंगलबार राति जारी गरेको सूचनामा उल्लेख छ । चिकित्सक र बिरामीमा कोरोना संक्रमण भएको भन्दै अस्पतालको आकस्मिक सेवासमेत बन्द गरिएको छ । अहिले पनि ६० भन्दा बढी बिरामीले सोही अस्पतालमा उपचार गराइरहेका छन् । बिरामी र कुरुवाको स्वाब कलेक्सन गरी परीक्षण रिपोर्ट नआएसम्म अस्पताल बाहिर जान रोक लगाएको मेडिकल कलेजका प्रमुख डा. कार्कीले बताए ।
उनले भने– ‘जति पनि भर्ना भएका बिरामी हुनुहुन्छ उहाँहरूको सुरक्षित तरिकाले यही अस्पतालमा उपचार भइरहेको छ । यस्तो अवस्थामा संक्रमित अस्पताललाई सिल गरेर भर्ना भएका बिरामीलाई डिस्चार्ज नगरी परीक्षण गर्नुपर्ने हुन्छ ।’ बिरामी मात्र नभई ट्रेसिङमा बिरामी कुरुवा, भिजिटर, चिकित्सक, नर्स, कर्मचारी सबै तानिने हुनाले झन्डै २ सयको हाराहारीमा टे«सिङको संख्या पुग्ने अनुमान गरिएको उनले बताए । यदि यो अस्पतालको क्षमताभन्दा बढी संख्यामा संक्रमण देखिएमा सरकारले संक्रमितलाई व्यवस्थित तरिकाले अर्को अस्पतालमा सार्न सक्ने हुँदा कसैले चाहेर पनि डिस्चार्ज भने हुन नपाउने डा. कार्कीले बताए । नेपाल समाचारपत्र दैनिक
