लहान । रौतहटको राजपुरस्थित फरहदवामा रहेको इँटाभट्टामा जिउँदै मानिस जलाउन सहयोग गरेको आरोपमा एक अभियुक्त पक्राउ परेका छन् । लामो समयदेखी भारतको सीमावर्ति क्षेत्रमा लुकिछिपी बस्दै आएका बारा सिम्रौनगढ नगरपालिका–४ का ५५ वर्षीय मुक्ति साहलाई प्रहरीले प्रक्राउ गर्न सफल भएको हो । २०६४ साल चैत २७ गते पहिलो संविधानसभा निर्वाचन हुने अघिल्लो दिन बम बनाउँदा घाइते भएका मानिसलाई इँटाभट्टामा जिउँदै जलाएर हत्या गरिएको आरोपमा कांग्रेस सांसद मोहम्मद अफताव आलम हाल पुर्पक्षका लागि थुनामा छन् । उनैलाई सहयोग गरेको आरोप साहलाई लगाइएको छ । साह त्यसबेलामा सो इँटाभट्टामा मिस्त्रीको काम गर्ने गरेका थिए । जिँउदै रहेका व्यक्तिलाई इँटाभट्टामा हाल्न उनले पनि सहयोग गरेको प्रहरीको अनुसन्धानबाट खुलेको थियो ।

भारतको सीमावर्ती इलाका सिम्रौनगढ नगरपालिका– ८ बाट शनिबार राति साहलाई पक्राउ गरेको प्रदेश–२ का प्रहरी प्रमुख डीआईजी धिरजप्रताप सिंहले जानकारी दिए । पक्राउ परेका साहलाई आवश्यक कारवाहीका लागि जिल्ला अदालत रौतहटमा बुझाइएको छ । घटनाको १३ वर्षपछि उनी पक्राउ परेका हुन् । आरोप लागेका अन्य ९ जना अझै पनि फरार रहेका छन् । पूर्वमन्त्री शेख इद्रिसको गोठमा बम विस्फोट गराई मानिसलाई इँटाभट्टामा जलाइएको मुद्दामा आलम गत कात्तिक २९ गतेदेखि नख्खु जेलमा छन् । सो घटनामा पूर्वमन्त्रीलगायत उनका भाइ महताब आलम, मोहम्मद मोबिन आलम, शेख भदई, शेष सराज, शेख फजलेहक, सगिर आलम, शेख मलकार, गौरीशंकर साह र बद्रि सहनी अझै फरार छन् । घटना भएको यकिन गरिए पनि घाइते र मृतकको संख्या भने ठ्याक्कै खुल्न नसकेको प्रहरीले जानकारी दिएको छ ।

राजपुर नगरपालिका–४ ९साबिक राजपुर गाविस–४० स्थित आलमका काका शेख इद्रिसको गोठमा बम विस्फोट भएको थियो । सो घटनामा यमुनामाई गाउँपालिका–४ ९साबिक सरुअठा–४ ० का त्रिलोकप्रसाद सिंह (पिन्टु) र ओसी अख्तर घाइते भएका थिए । उनीहरुलाई इँटाभट्टामा घाइते अवस्थामा जिउँदै जलाइएको आलमलगायत ११ जनामाथि आरोप छ । राजनीतिक आवरणमा लुकाइएको यो घटनाको १२ वर्षपछि असोज २६ गते आलम पक्राउ परेका थिए ।

सोही घटनामा मारिएको भनिएका युवकको बाबु श्रीनारायण राजपुतको जाहेरीमा साह पनि अभियुक्त किटान गरिएको थियो । पक्राउ परेका साहले तत्कालिन कांग्रेस नेता आलमको निर्देशनमा आफूले मृत्यु भएका २÷३ जना र घाइते भएका १६ जनालाई ट्याक्टरमा लिएर इँटा उद्योगको चिम्नीमा लगी जलाएको बयान दिएको डीआईजी सिंहले बताए । घटनापछि साहले आलमकै निर्देशनमा मृतक र घाइतेहरुलाई ट्याक्टरमा लोड गरी नजिकैको राजा इँटा उद्योगमा लगी जलाएको बयान प्रहरी समक्ष दिएको प्रहरी कार्यालय जनकपुरधामले जनाएको छ । सौर्य दैनिक