एजेन्सी । बलिउड अभिनेत्री आलिया भट्टकी पूर्व निजी सहायक वेदिका प्रकाशलाई मुम्बई प्रहरीले पक्राउ गरेको छ ।
वेदिकामाथि आलियालाई ७७ लाख रुपैयाँ ठगी गरेको आरोप छ । रिपोर्टका अनुसार वेदिकाले २ वर्षदेखि अभिनेत्रीको व्यक्तिगत र प्रोडक्सन हाउसको खाताबाट लाखौं रुपैयाँ लुटेकी छिन् ।
वेदिका जुलाई १० सम्म प्रहरी हिरासतमा रहनेछिन् । उनको खोजी लगभग ५ महिनादेखि भइरहेको थियो । मुम्बई प्रहरीले उनलाई बैंगलोरबाट पक्राउ गरेको हो ।
आलिया भट्टकी आमा तथा अभिनेत्री सोनी राजदानले जनवरीमा वेदिका प्रकाश विरुद्ध जुहू प्रहरीमा ठगीको उजुरी दिएपछि यो घटना बाहिर आएको थियो । उनी विरुद्ध धारा ३१६ (४), ३१८ (४) अन्तर्गत उजुरी दर्ता गरिएको थियो । त्यसबेलादेखि उनको खोजी भइरहेको थियो ।
प्रहरीका अनुसार आलिया भट्टसँग काम गर्दा वेदिकालाई अभिनेत्रीको आर्थिक जिम्मेवारी दिइएको थियो । सँगै काम गर्दा वेदिकाले आलियालाई धेरै नक्कली कागजातमा हस्ताक्षर गराइन् ।
उनी यात्रा, बैठक, कार्यक्रम खर्चसँग सम्बन्धित नक्कली बीलहरू बनाउँथिन्, जसको लागि उनले अनलाइन इमेजिङ एपहरू प्रयोग गर्थिन् । वेदिकाले आफ्ना साथीहरूलाई पनि पैसाको लेनदेनमा संलग्न गराउँथिन् ।
वेदिका प्रकाश मुम्बईको एनजी कोअपरेटिभ हाउसिङ सोसाइटीमा बस्छिन् । उनलाई २०२४ मा व्यक्तिगत प्रबन्धकको पदबाट हटाइयो । आलिया बाहेक, वेदिका धेरै कलाकारहरूको प्रबन्धक रहेकी छिन् ।
आलियाले सन् २०२१ मा प्रोडक्सन हाउस इटरनल सनशाइन प्राइभेट लिमिटेड सुरु गरेकी थिइन् । शाहरुखको रेड चिली प्रोडक्सनसँगको सहकार्यमा, यस प्रोडक्सन हाउसको ब्यानरमा आलियाले फिल्म डार्लिङ्स निर्माण गरेकी छिन् जसमा उनी र शेफाली शाह मुख्य भूमिकामा थिए ।
