काठमाडौं । राष्ट्रिय पुनर्निर्माण प्राधिकरणका कार्यकारी समितिका सदस्य डा. विष्णुबहादुर भण्डारीले सरकारी उच्च ओहोदामा रहेर तलबभत्ता लिई राष्ट्रिय प्रजातन्त्र पार्टीको केन्द्रीय सदस्यको हैसियतमा काम गरिरहेको पाइएको छ । विद्यमान कानुनअनुसार सरकारका सार्वजनिक संस्थान, निकाय वा संस्थामा कार्यरत व्यक्तिले कुनै पनि पार्टीको सदस्यता लिन पाइँदैन । तर, राष्ट्रिय प्रजातन्त्र पार्टीका केन्द्रीय सदस्य भण्डारीले सो कानुनी प्रावधानविपरीत पुनर्निर्माण प्राधिकरणको कार्यकारी समिति सदस्यका रूपमा काम गर्दा पनि उनीमाथि कारबाही भएको छैन । तीन वर्षअघि पुनर्निर्माण प्राधिकरणको कार्यकारी समितिको सदस्यमा नियुक्त भएका उनलाई राप्रपाले गत २९ जेठमा केन्द्रीय सदस्यमा नियुक्त गरेको थियो । पार्टीले केन्द्रीय सदस्यमा नियुक्त गर्दा पनि भण्डारीले पुनर्निर्माण प्राधिकरणबाट राजीनामा दिएका छैनन् । पार्टीको केन्द्रीय सदस्य बनेका उनी प्राधिकरणको विभिन्न बैठकमा सहभागी भइरहेका छन् ।
राष्ट्रिय प्रजातन्त्र पार्टीका प्रचार विभाग प्रमुख राजाराम श्रेष्ठले डा. भण्डारीलाई गत २९ जेठमा सम्पादन समिति सदस्यका रूपमा नियुक्त गरिएको पुष्टि गरे । तर, राष्ट्रिय प्रजातन्त्र पार्टीका केन्द्रीय सदस्य तथा प्राधिकरणका कार्यकारी समितिका सदस्य डा. भण्डारीले भने आफू पार्टीमा नरहेको दाबी गरे । ‘म पहिला राष्ट्रिय प्रजातन्त्र पार्टीमा भए पनि अहिले राष्ट्रिय पुनर्निर्माण प्राधिकरणमा मात्र रहेको छु,’ भण्डारीले भने । प्राधिकरण जस्तो महत्वपूर्ण निकायलाई राजनीतिक थलोका रूपमा विकास गरिँदा उत्कृष्ट काम गर्न नसकेको आरोप प्राधिकरणमाथि लाग्दै आएको छ ।
राष्ट्रिय पुनर्निर्माण प्राधिकरण प्रधानमन्त्री तथा मन्त्रिपरिषद् कार्यालय मातहत रहेको निकाय हो । प्राधिकरणका कार्यकारी सदस्य भण्डारी राप्रपाका केन्द्रीय सदस्यमा नियुक्त भएपछि उनीमाथि प्रधानमन्त्री कार्यालयबाटै छानबिन हुनुपर्ने माग उठेको छ । प्रधानमन्त्री तथा मन्त्रिपरिषद् कार्यालयका प्रवक्ता राजेन्द्रकुमार पौडेलले प्राधिकरणमा रहेका कार्यकारी सदस्यहरु कुनै पनि पार्टीको केन्द्रीय सदस्यमा रहने कार्य गैरकानुनी हुने बताए । उनका बारेमा आवश्यक छानबिन भइरहेको पनि प्रवक्ता पौडेलले जानकारी दिए ।
संवैधानिक अंगमा नियुक्ति हुने व्यक्ति पनि राजनीतिक दलको सदस्य भएको हुन नहुने र उच्च नैतिकवान् हुनुपर्ने संवैधानिक प्रावधान छ । नैतिकताको हिसाबले पनि सरकारी तलब भत्ता लिएर पार्टीको गतिविधि सञ्चालन गर्नुहुँदैन । तर, डा. भण्डारीले भने राष्ट्रिय पुनर्निर्माण प्राधिकरणमा रहेकै बेला पार्टीको केन्द्रीय सदस्यमा नियुक्ति भई पार्टी गतिविधिमा संलग्न हुन थालेका हुन् । राजधानी दैनिक
