काठमाडौं । गायिका समीक्षा अधिकारीले नेकपा एमालेका नेता महेश बस्नेतले आफ्नो चरित्र हत्या हुने गरी फेसबुक स्टाटस लेखेको बताएकी छन् ।
उनले कुनै घटनाबाट आफूलाई चोख्याउने प्रयासमा बस्नेतले यस्तो कार्य गरेको पनि बताएकी छन् । सामाजिक सञ्जाल फेसबुकमार्फत् उनले बस्नेतको कार्यले आफू अत्यन्त विक्षिप्त बनेको बताएकी हुन् ।
प्रधानमन्त्री केपी शर्मा ओलीले लेखेको फेसबुक पोस्टले आफूलाई केही हौसला र राहत मिलेको भए पनि प्रधानमन्त्रीकै विश्वासपात्र बस्नेतको पोस्टले भने आफूलाई थप पीडा दिएको अधिकारीको भनाइ छ ।
उनले लेखेकी छन्, “सम्माननीय प्रधानमन्त्रीज्यू, हजुरले लेख्नुभएको फेसबुक पोस्टले मलाई हौसला दियो र केही मात्रामा राहत पनि मिल्यो। तर त्यो पोस्टको मसी सुक्न नपाउँदै, हजुरकै अत्यन्त विश्वास पात्र महेश बस्नेतज्यूले कुनै घटनाबाट आफूलाई चोख्याउन मेरो चरित्र हत्या हुने गरी अनेक कुरा लेख्नुभएको देख्दा म अत्यन्त विक्षिप्त बनेकी छु ।”
गायिका अधिकारीले जनताको अदालतभन्दा ठूलो अरू केही नभएको बताउँदै, आफ्नो जीवनमा जानाजान हारेर पनि कसैलाई जिताएर आएको कुरा तीन करोड जनतालाई थाहा भएको उल्लेख गरेकी छन् । उनले नेता बस्नेतलाई धेरै कुरा भन्न नलगाउनसमेत चेतावनी दिएकी छन् ।
अधिकारीले बस्नेतलाई प्रश्न गर्दै भनेकी छन्, “बस्नेत ज्यूलाई मेरो प्रश्न छ, मलाई र हजुरकी डाक्टर छोरी एकै ठाउँमा राखेर सोच्नुभएको भए के यस्तो लेख्ने हिम्मत आउँथ्यो…..?”
