तनहुँ: राष्ट्रिय फोटो पत्रकार समूह नेपाल (एनएफपिजे) ले तनहुँ जिल्लाको प्रसिद्ध पर्यटकीय गन्तव्य बन्दीपुरमा फोटो यात्रा अभियान सम्पन्न गरेको छ ।
शनिबार आयोजना गरिएको ‘बन्दीपुरको पर्यटन प्रबर्धनमा फोटो पत्रकारको भूमिका’ विषयक अन्तरक्रिया कार्यक्रम मार्फत अभियानको सुरुवात गरिएको हो ।
तस्बिर र भिडियोको माध्यमबाट बन्दीपुरको प्रचार प्रसारमा सक्रिय भूमिका खेल्ने उद्देश्यका साथ बन्दीपुर भ्रमण वर्ष २०२५ को सहयोगका लागि उक्त अभियान थालनी गरिएको हो । एनएफपिजे नेपाल कास्की र तनहुँ शाखाको संयुक्त आयोजनामा काठमाडौंबाट आठ जना, तनहुँबाट १० जना र पोखराबाट १० जना गरि २८ जना फोटो पत्रकारहरुको टोली उक्त कार्यक्रममा सहभागी भएको थियो ।
फोटो पत्रकारहरुलाई बन्दीपुर होमस्टेका आमा समूहले न्यानो स्वागत गरेका थिए ।
त्यस अवसरमा सहभागी फोटो पत्रकारहरुले बन्दीपुरको प्राकृतिक सौन्दर्यका साथै बन्दीपुरमा रहेका विभिन्न धार्मिक एवं सांस्कृतिक स्थलहरु खड्गदेवी मन्दिर, थानीमाई मन्दिर, भियतनामी शैलीको गुम्बा, मणिमुकुन्देश्वरी पदमार्ग, सिद्धगुफा, टुँडीखेल, बन्दीपुर केबलकार लगायतका विभिन्न स्थानको अवलोकन तथा फोटो कैद गरेका थिए ।
उक्त भ्रमणको अवसरमा आयोजित कार्यक्रममा बन्दीपुर भ्रमण वर्ष २०२५ का संयोजक वैंशबहादुर गुरुङले फोटो पत्रकार समूहको अभियानले भ्रमण वर्षको सफलतामा थप ऊर्जा थप्ने विश्वास व्यक्त गर्नु भएको थियो ।
त्यसैगरी बन्दीपुर गाउँपालिकाका अध्यक्ष सुरेन्द्रबहादुर थापाले सञ्चार माध्यममा फोटो तथा भिडियोको प्रकाशन र प्रसारणले स्वदेश तथा विदेशका पर्यटकलाई आकर्षित गर्ने भन्दै यस अभियानले पर्यटन प्रबर्धनमा महत्वपूर्ण योगदान पु–याउने विश्वास व्यक्त गर्नुभयो ।
शब्द, तस्बिर: प्रदीपराज वन्त
