काठमाडौँ । आईसीसी यु–१९ विश्वकप एसिया छनोटअन्तर्गत नेपालले विजयी सुरुवात गरेको छ । आफ्ना पहिलो खेलमा नेपालले युएइलाई डिएसएल पद्धतिबाट हराएको हो ।
मुलपानी क्रिकेट मैदानमा नेपालले दिएको २०१ रनको लक्ष्य पछ्याएको युएईले ३६ ओभरको खेल सकिँदा ७ विकेट गुमाएर १७१ बनाएको थियो ।
सोही समयमा वर्षा भएसँगै अँधेरो हुन लागेसँगै डिएलएस पद्धतिमार्फत नतिजा निकालिएको हो । युएईका लागि यायिन किरण रायले अविजित १०४ रन बनाए पनि जितका लागि पर्याप्त हुन सकेन ।
त्यसअघि मुलपानी क्रिकेट मैदानमा पहिला ब्याटिङ गरेको नेपालले निर्धारित ४० ओभरमा ९ विकेट गुमाएर २०० रन जोड्यो ।
नेपालका लागि कप्तान नरेन भट्टले अर्धशतकीय पारी खेले । नरेनले ७५ बलमा ६७ रन बनाए । यस्तै, दिलसाद अलीले ३४ र साहिल पटेलले ३२ रन जोडे । बलिङतर्फ युएईका उदिस सुरीले ३ विकेट लिए ।
मैदान भिजेको कारण केही ढिला सुरु भएको खेल ४० ओभरमा घटाइएको थियो । जितसँगै नेपालले २ अंक जोडेको छ ।
