सिन्धुपाल्चोक । गए रातिको अविरल वर्षाले पहिरो जाँदा मेलम्ची–११ मेलम्ची बजारमा आठ जना बेपत्ता भएका मध्ये ३ जनाको शव भेटिएको छ ।
मेलम्ची नगरपालिका वडा नम्बर ११ मा सोमबार बिहान साढे ३ बजेतिर गैह्रीबजारको केही भाग भासिएर कभर्ड हल पुरिँदा बेपत्ता भएकामध्ये ३ जनाको शव भेटिएको जिल्ला प्रहरी कार्यालय सिन्धुपाल्चोकका प्रवक्ता डीएसपी माधवप्रसाद काफ्लेले जानकारी दिए ।
प्रहरीका अनुसार कभर्ड हल निर्माणमा खटिएका ७ जना नेपाली र एक भारतीय नागरिक गरी ८ जना कामदार बेपत्ता भएका हुन । बेपत्ता नेपालीहरु पर्साका भएको बुझिएको प्रहरीले बताएको छ ।
पहिरोमा परी घाइते भएका ३५ वर्षीय भारतीय नागरिक बारु साहलाई उद्धार गरी थप उपचारका लागि मेलम्ची प्राथमिक स्वास्थ्य केन्द्र लगिएको उनले बताए । अहिले घटनास्थलमा सुरक्षाकर्मी र स्थानीय मिलेर बेपत्ताको खोजी गरिरहेका छन् ।
