काठमाडौँ। भारतीय राज्य ओडिसास्थित कलिङा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालय नेपाली विद्यार्थीहरूका लागि कक्षा सञ्चालन एवं छात्रावासको व्यवस्था गर्ने जनाएको छ।
‘यस राजदूतावासबाट अनुरोध भएबमोजिम उक्त शैक्षिक संस्थाले सोहीअनुसार विद्यार्थीहरूलाई छात्रावासमा बस्ने व्यवस्था मिलाई नेपाली विद्यार्थीहरूका लागि कक्षा सञ्चालनको व्यवस्था गर्ने जानकारी यस राजदूतावासलाई गराएको छ,’ दूतावासले सोमबार जारी गरेको विज्ञप्तिमा भनिएको छ।
आइतबार बुटवलकी प्रकृति लम्सालको कलेजको होस्टलमा मृत अवस्थामा भेटिएकी थिइन् । लम्साल मृत भेटिएपछि गम्भीरतापूर्वक अनुसन्धान गर्न माग गर्दै नेपाली विद्यार्थीहरुले कलेजविरुद्ध प्रदर्शन गरेका थिए । नेपाली विद्यार्थीहरु प्रदर्शनमा उत्रिएपछि कलेजले उनीहरुलाई निष्काशन गरेको थियो ।
भिडियोमा सारी लगाएका दुई शिक्षिकाले नेपाली छात्रालाई तुरुन्त सामान प्याक गर्न भन्दै थर्काएको देखिन्छ । एक शिक्षिका भन्छिन्, ‘तिमीहरु आफैंले आफूलाई यस्तो गरेको हो । हामी तिमीहरुलाई रातिदेखि नै सम्झाइरहेका छौं, स्थानीय प्रशासनले टेकओभर गर्नेछ ।’
अर्की शिक्षिका आएर थप्छिन्, ‘तुरुन्तै सामान प्याक गरेर निस्किहाल । यहाँ प्रहरी आउँदैछ ।’ एक नेपाली छात्राले प्रश्न गर्छिन्, ‘हाम्रो गल्ती के हो ?’ शिक्षिका बम्किन्छिन्, ‘हामीलाई थाहा छैन तिमीहरुको गल्ती के हो । हामी यत्ति भन्छौं, तिमीहरुले हामीलाई यो निर्णय लिन बाध्य बनायौं । अब तिमीहरु कोही यहाँ सुरक्षित छैनौं । जहाँ सुरक्षित छौ, त्यही जाऊ ।’
विज्ञप्तिसहित
