पोखरा । आयोजक टाइगर ग्रुपले पाँचौ टाइगर कप भलिबलको महिलातर्फको उपाधि जितेको छ ।
पोखरा रंगशालास्थित भलिबल कोर्टमा आइतबार भएको निकै प्रतिस्पर्धात्मक फाइनलमा टाइगर ग्रुपले साविक विजेता एपीएफविरुद्ध पुनरागमन जित निकाल्दै ३–२ को सेटमा हराउँदै उपाधिमाथि कब्जा गरेको हो ।
फाइनलसम्म अपराजित एपीएफले अन्तिम खेलमा पराजित हुँदा उपाधि रक्षा गर्न सकेन । टाइगर ग्रुपले खेलमा दुई पटक पछि परेको स्थिती उल्टाउदै पुनरागमन जित निकालेको हो ।
पहिलो सेट एपीएफले २५–१७ ले आफ्नो पक्षमा पार्दै अग्रता लिएको थियो । दोस्रो सेट निकै प्रतिस्पर्धात्मक बन्यो । जहाँ टाइगर ग्रुपले टाई ब्रेकमा २९–२७ ले सेट आफ्नो पक्षमा पार्दै खेल बराबरी गर्यो । तेस्रो सेट २५–२१ ले आफ्नो पक्षमा पार्दै एपीएफले फेरि अग्रता लियो ।
तर चौथो सेटमा टाइगर ग्रुपले पुनरागमन गर्दै २५–१६ ले सेट आफ्नो पक्षमा पार्दा खेल पाँचौ सेटसम्म लम्बियो । पाँचौ सेट निकै प्रतिस्पर्धात्मक बनेको थियो । तर घरेलु समर्थकको साथ पाएको टाइगर ग्रुपले पाँचौ सेट १५–१२ ले आफ्नो पक्षमा पार्दै खेलमात्रै जितेन उपाधि नै जित्यो ।
आयोजक टोलीले पहिलो पटकमै उपाधि जितेको हो । च्याम्पियन टाइगर ग्रुपले उपाधिसँगै ५ लाख ८५ हजार ५५५ रुपैयाँ प्राप्त गरेको छ । फाइनलमा पराजित भएको एपिएफले २ लाख ८५ हजार ५५५ रुपैयाँमा चित्त बुझायो ।
पुरुषतर्फको उपाधिका लागि नेपाल पुलिस क्लब र गण्डकी प्रदेशबीच आजै प्रतिस्पर्धा हुँदैछ ।
