एजेन्सी । बोर्डर–गावस्कर ट्रफीको चौथो टेस्टको पहिलो दिन अस्ट्रेलियाले भारतविरुद्ध ६ विकेटमा ३११ रन बनाएको छ । बिहीबार स्टम्पसम्म स्टिभ स्मिथ ६८ र कप्तान प्याट कमिन्स ८ रनमा अविजित रहे ।
मेलबर्नमा भएको एमसीजीमा अष्ट्रेलियाले टस जितेर ब्याटिङ गर्ने निर्णय गरेको थियो । १९ वर्षीय युवा ओपनर साम कोन्स्टास (६० रन) र उस्मान ख्वाजा (५७ रन)ले कङ्गारु टोलीलाई राम्रो सुरुवात गराए । दुवैले ११६ बलमा ८९ रनको ओपनिङ पार्टनरसिप गरे ।
मार्नस लाबुस्चेनले ७२ रन र विकेटकिपर एलेक्स केरीले ३१ रनको योगदान दिए । मिचेल मार्स ४ र ट्राभिस हेड शून्य रनमा आउट भए । दिनको पहिलो सत्रमा अस्ट्रेलियाले वर्चस्व कायम राखेको थियो भने दोस्रो सत्र मिश्रित रह्यो । त्यसपछि दिनको अन्तिम सत्रमा भारतले पुनरागमन गर्यो।
बलिङमा भारतका जसप्रित बुमराहले ३ विकेट लिए भने आकाश दिप, रविन्द्र जडेजा र वासिन्टन सुन्दरले १/१ विकेट हात पारेका छन्।
अहिले ५ खेलको सिरिज १–१ को बराबरीमा छ । पहिलो टेस्ट भारतले जितेको थियो भने दोस्रो टेस्ट अस्ट्रेलियाले जितेको थियो। तेस्रो टेस्ट बराबरी भएको थियो।
