काठमाडौँ । जिल्ला प्रहरी कार्यालय कास्कीले हिरासतमा रहेका पूर्व गृहमन्त्री एवं राष्ट्रिय स्वतन्त्र पार्टी (रास्वपा) का सभापति रवि लामिछानेमाथि दुर्व्यवहार भयो भन्नु भ्रामक भएको बताएको छ ।
आइतबार जिल्ला प्रहरी कार्यालय कास्कीले एक विज्ञप्ति जारी गर्दै हिरासतमा रहेका लामिछानेमाथि दुर्व्यवहार भयो भन्नु भ्रामक भएको प्रतिक्रिया दिएको हो ।
कात्तिक २ गते काठमाडौंबाट पक्राउ परेका लामिछानेमाथि प्रहरीले हिरासतमा राखेर अनुसन्धान गरिरहेको छ ।
रविलाई अदालतमा उपस्थित गराउने क्रममा प्रहरीले अपशब्द बोलेको, इजलासमा हतियारसहित प्रवेश गरेको, धम्क्याएको खबर भ्रामक र झुटो रहेको विज्ञप्तिमा जनाइएको छ ।
सहकारी प्रकरणमा पक्राउ परेका लामिछानेमाथि अनुसन्धान गर्न प्रहरीलाई कास्की जिल्ला अदालतले कात्तिक ८ गते थप सात दिनको म्याद दिएको छ ।
सो समयमा रविलाई भेट्न नदिएको भन्दै लामिछाने पक्षका वकिलले सामाजिक सञ्जालबाट लाइभ गरेका थिए ।
