काठमाडौं । भारतका विदेशमन्त्री एस जयशंकर पाकिस्तान पुगेका छन् । दुई देशबीच वर्षौंदेखि कायम रहेको तनावका बीच कुनै पनि शीर्ष भारतीय नेतृत्वको पाकिस्तान भ्रमण ९ वर्षपछि भएको हो ।

संघाई कोअपरेसन अर्गनाइजेसन (एससीओ) को २३ औं सम्मेलनमा सहभागी हुन भारतीय विदेशमन्त्री जयशंकर इस्लामावाद पुगेका हुन् । एससीओका सदस्य राष्ट्रका सरकार प्रमुखहरुको बैठकको आयोजना पाकिस्तानले गरेको छ । पाकिस्तानले त्यसमा सहभागिताका लागि भारतका प्रधानमन्त्री नरेन्द्र मोदीलाई निमन्त्रणा गरेको थियो । तर, उक्त समिटमा मोदी नगएर विदेशमन्त्री जयशंकर गएका हुन् ।

मोदी पहिलो पटक प्रधानमन्त्री भएको एक वर्षपछि २०१५ को डिसेम्बरमा आकस्मिक रूपले पाकिस्तानको यात्रा गरेका थिए । त्यतिबेला उनी पाकिस्तानका तात्कालिन प्रधानमन्त्री नवाज सरिफको लाहोरस्थित घरमै पुगेका थिए । त्यसयता भारतबाट भएको पहिलो उच्चस्तरीय भ्रमण जयशंकरकै भएको हो ।

२०१६ मा उरीस्थिति भारतीय सेनाको ब्रिगेड मुख्यालयमा आतंकवादी हमला भएपछि दुई देशबीचको सम्बन्ध तनावपूर्ण बन्न पुग्यो । त्यसयता विभिन्न घट्नक्रमले दुई देशको सम्बन्ध तनावपूर्ण नै रहँदै आएको छ । पाकिस्तानका तात्कालिन विदेशमन्त्री बिलवाल भुट्टो गतवर्ष एससीओको विदेशमन्त्रीस्तरीय बैठकमा भाग लिन भारत आएका थिए । भारतले गोवामा गतवर्ष उक्त बैठकको आयोजना गरेको थियो । भुट्टोको उक्त भारत भ्रमण पाकिस्तानबाट १२ वर्षपछि त्यहाँका विदेशमन्त्रीको भारत यात्रा थियो ।

दुई देशका सरकार प्रमुखहरू पनि एससीओको शिखर सम्मेलनमा मञ्च साझा गरिसकेका छन् । विदेशमन्त्रीहरूले एक अर्काको देशको यात्रा गरेका छन् । तर, आपसी सम्बन्धमा भने अझै सुधार आइसकेको छैन । पाकिस्तान यात्रा गर्नुपूर्व विदेशमन्त्री जयशंकरले एससीओ सम्मेलनसँग सम्बन्धित विषय बाहेक द्विपक्षीय कुराकानी नहुने बताएर पाकिस्तानसँगको सम्बन्धमा तत्कालै सुधार आइनहाल्ने संकेत दिएका छन् ।

दुई देशको सम्बन्धमा आएको तनावका कारण सार्क सम्मेलन छायाँमा परेको छ । २०१४ मा नेपालमा भएको सार्क सम्मेलनपछि २०१६ मा उक्त सम्मेलन पाकिस्तानले आयोजना गर्ने तय थियो । इस्लामावादमा हुने तय भएको उक्त सम्मेलन दुई देशबीचको तनावका कारणले हुन सकेको छैन ।एससीओमा चीन, रूस, भारत, ईरान, कजाकिस्तान, किर्गिस्तान, ताजिकिस्तान, उज्जबेकिस्तान, पाकिस्तान र बेलारूस सदस्य राष्ट्र छन् ।