काठमाडौं । देशभ दशैंको उल्लास छ । विदेशीएकाहरु घर फर्किरहेका छन् । देशभित्रै भए पनि आफ्नो थातथलो छाडेर बाहिर बसिरहेकाहरु घर फर्किंदै छन् । ठाउँठाउँमा पिङ हालेर रमाइलो गरिँदै छ । शक्तिपीठहरु झकिझकाउ पारिएको छ । मन्दिरमा मानिसको बिहानैदेखि साँझ अबेरसम्म घुइँचो लाग्छ ।
यो बेला मौसम पनि निकै सुन्दर भएको छ । मनसुन लगभग बाहिरिएको छ । आकाश खुलेको छ । खेतमा लगाइएको धान पाकेर झुलेको छ । गाउँवस्तीमा खुसीयाली छाएको छ । दशैंका लागि मानिसहरुलाई खसीबोका खरिद बिक्री गर्ने चटारो छ ।
देशका विभिन्न भागमा आज दिनभर देखिएका केही दृष्य समेटेर राससकर्मीहरुले विभिन्न स्थानमा खिचेका तस्बिर ।
बडादसैँको सातौँ दिन बुधबार बिहान दाङको घोराही उपमहानगरपालिका- १८ स्थित अम्बिकेश्वरी मन्दिर अम्बापुरमा पूजाअर्चना गर्न आएका भक्तजन ।
महाेत्तरी जिल्लाकाे सदरमुकाम जलेश्वर नगरपालिका-१ मा दुर्गा पूजाको लागि बिजुली बत्तीले झिलिमिली सजाइएकाे दुर्गा मन्दिर ।
काठमाडौँको गोङ्गबुस्थित नयाँ बसपार्कमा बडादसैँका लागि घर जाने यात्रुको घुइँचो ।
म्याग्दीको अन्नपूर्ण गाउँपालिका–७ घराम्दी गाउँमा दसैँको अवसरमा हालिएको लिङ्गेपिङ खेल्नका लागि मगर समुदायको मौलिक वेशभूषामा सजिएर भेला भएका स्थानीयबासीहरु र पृष्ठभूमिमा देखिएको निलगिरी र अन्नपूर्ण हिमशृङ्खलाको दृष्य ।
नेपाल–भारत सीमा सुनौली नाकामा दसैँको समयमा भारतबाट फर्किंदै गरेका सर्वसाधारण तथा सवारीसाधनको भीड ।
दसैँका लागि हिमाली जिल्लाहरुबाट ल्याएर पोखराको सिमपानीमा बिक्रीका लागि राखिएका च्याङ्ग्रा बुधबार छनोट गर्दै ग्राहक । यसवर्ष पोखरामा १५ हजार हाराहारीमा भेडाच्याङ्ग्रा ल्याइको छ ।
तनहुँको व्यास नगरपालिका–३ प्रशासन चोकमा बुधबार बिक्रीका लागि खसी जोख्दै । जिउँदो प्रतिकेजी रु पॉच सय ५० मा खसी बिक्री भइरहेको छ ।
कपिलवस्तुको चन्द्रौटामा बुधबार पिङ खेल्दै बालबालिका ।
म्याग्दीको अन्नपूर्ण गाउँपालिका–५ पाउद्धारमा दसैँका अवसरमा हालिएको लिङ्गेपिङ खेल्दै स्थानीय महिला ।
दसैँको पूर्वसन्ध्यामा बागलुङको धवलागिरि बहुमुखी क्याम्पस परिसरमा बुधबार चङ्गा उडाएर रमाउँदै बालबालिका ।
