काठमाडैँ । देशभर मनुसन सक्रिय काठमाडौं उपत्यकासहित देशभर सघन वर्षा भइरहेको छ। पूर्वी र मध्य तराईमा भने भारी वर्षा भएको छ। यो क्रम आइतबारसम्मै रहने मौसम पूर्वानुमान महाशाखाले जनाएको छ।
कोशी प्रदेशका झापा, मोरङ, इलाममा अत्याधिक वर्षाले जनजीवन प्रभावित भएको छ। २४ घण्टाको अवधिमा झापाका चन्द्रगढी विमानस्थलमा सबैभन्दा बढी २३२.२, केचनामा २१२, अनारमनी विर्तामा २०२, गौरादहमा १९७, बाहुनडाँगीमा १६७ र सिस्नेमा १४३ मिलिमिटर वर्षा भएको छ ।
यस्तै, झापापछि सबैभन्दा धेरै इलामको माईचुलीमा २३१ मिलिमिटर वर्षा भएको छ । मोरङको बाहुनीमा १८०, विराटनगर विमानस्थलमा १८९.२, सप्तरीको बरमझियामा १८५, उदयपुरको सुन्दरपुरमा १५१, सप्तरीको रुपनी बजारमा १५२ मिलिमिटर वर्षा भइरहेको छ।
अहिले पूर्वी र मध्य तराईमा बढी वर्षा भइरहेकाले बादल गहिरिँदै गइरहेको त्रिभुवन विश्वविद्यालय जल तथा मौसम विज्ञानका सहप्राध्यापक विनोद पोखरेलले बताए। उनले वर्षा अझै बढ्न सक्ने बताए।
मौसमविद्का अनुसार शनिबार रातिबाट मात्रै वर्षा मत्थर हुने देखिन्छ।
