काठमाडौं । आईसीसी विश्वकप लिग–२ अन्तर्गत नेपाली टोलीले आज ओमानसँग प्रतिस्पर्धा गर्दैछ ।
क्यानडाको किंग्स सिटी मैदानमा हुन लागेको खेल नेपालीसमयअनुसार बेलुकाको ८:४५ बजेबाट सुरु हुनेछ ।
यसअघि खेलिएका तीन खेलमा लगातार हार बेहोरेको नेपालले आजको खेल जित्दै शृङ्खलाको सुखद् अन्त्य गर्न चाहन्छ ।
पहिलो खेलमा नेपाल क्यानडासँग १ सय ३ रनको फराकिलो अन्तरले पराजित भएको थियो । दोस्रो खेलमा ओमानसँग एक विकेटले पराजित भएको नेपाल तेस्रो खेलमा क्यानडासँगै ५ विकेटले पराजित भएको थियो ।
यो ओडीआई सिरिजपछि नेपालले क्यानडा र ओमानसँगै टी-२० सिरिज पनि खेल्नेछ । यसपछि नेपाल लिग २ का लागि अमेरिका जानेछ । त्यहाँ अमेरिका, नेपाल र स्कटल्यान्डबीच त्रिकोणात्मक र टी-२० आई दुवै सिरिज हुनेछ ।
