काठमाडौं । अमेरिकाको भर्जिनियामा ममता भट्टको हत्या श्रीमान नरेश भट्टले गरेका लगभग निश्चित भएको छ । ममताको हत्या गरी शरीर टुक्राटुक्रा पारी फरक–फरक ठाउँमा डिस्पोज गरेका प्रमाण अदालतमा पेश भएका छन् ।
नरेशविरुद्ध ठोस प्रमाण नभएको भन्दै उनका वकिलहरुले धरौटी अपिल गरेपछि ‘मोसन हियरिङ’ राखिएको थियो । अहिलेसम्म शव नभेटिएकाले शंकाकै आधारमा नरेशलाई थुनामा राख्न नमिल्ने उनका वकिलहरुले जिकिर गरेका थिए ।
सरकारी वकिलहरुले नरेशले हत्या गरेको प्रमाण र भिडियो फुटेजहरु अदालतमा पेश गरेका छन् । ममता बेपत्ता भएपश्चात र प्रहरीले उनको घरमा खानतलासी गर्नुअघि नरेशले पटकपटक गरी आफ्नो कारमा ट्र्यास ब्यागहरु बोकेर फरक–फरक ठाउँमा लगेर फ्याँकेको पाइएको छ ।
उनले कारबाट ट्र्यास ब्याग झिकेर फोहोरको कन्टेनरमा हालेको सीसीटीभी फुटेजमा प्रष्ट देखिएको छ । नरेशले जुलाई २९ र ३० मा घरबाट १२ पटकसम्म ट्र्यास टाढा लगेर व्यवस्थापन गरेका पाईएको छ ।
सरकारी वकिलको अनुसार प्रहरीले घरमा खानतलासी गर्न आउनु अगाडि नै नरेशले लाशको व्यवस्थापन गरिसकेको र घरभित्र पनि सबै सरसफाइ गरेर बसेका थिए । उनले ट्रयास ब्यागमा आफ्नो फिङ्गरप्रिन्ट नबस्ने गरी ग्लोभ्स र नेपकिन पेपर प्रयोग गरेका पाईएको छ । घटनापछि उनले आफ्नो टेस्ला कार बिक्री गरेका थिए ।
ममता अन्तिमपटक २७ जुलाईमा आफूले काम गर्ने ठाउँमा गएकी थिइन् । नरेशले भने ३१ तारिखको राति ममता घरमै रहेको र भोलिपल्ट अफिस गएको दाबी गरेका छन् ।
