रुद्रप्रयाग । सोनप्रयागमा सोमबार राति गएको पहिरोमा परी मृत्यु हुनेको सङ्ख्या पाँच पुगेको छ । सो घटनामा तीन जना घाइते अवस्थामा फेला परेका छन् ।
अविरल वर्षाका कारण सो क्षेत्रमा पहिरो गएको र हाल राहत र उद्धार जारी रहेको जनाइएको छ ।
रुद्रप्रयागका अतिरिक्त जिल्ला मजिस्ट्रेट श्यामसिंह रानाले भन्नुभयो, “गए राति सोनप्रयाग नजिक राष्ट्रिय राजमार्गमा पहिरो खसेको थियो । पहिरोमा परी पाँच जना यात्रुको मृत्यु भएको छ भने तीन जनालाई राज्य विपद् प्रतिक्रिया बल (एसडीआरएवफ)ले उद्धार गरेको छ ।” उहाँले यात्रुहरुलाई मौसमको अवस्थालाई ध्यान दिन आग्रह गर्नुभयो ।
उत्तराखण्ड प्रहरीका अनुसार केही यात्रुहरू पहिरोमा यात्रुहरु पहिरोमा पुरिएको जानकारी प्राप्त भएपछि प्रहरी, प्रशासन, राज्य विपद् प्रतिक्रिया बल र राष्ट्रिय प्रकोप प्रतिक्रिया बलहरूले संयुक्त अभियान सञ्चालन गरेका थिए ।
उत्तराखण्डका मुख्यमन्त्री पुष्कर सिंह धामीले सामाजिक सञ्जालमार्फत उक्त दुर्घटनाप्रति दुःख व्यक्त गर्नुभएको छ । “सोनप्रयाग–मुंकटिया (रुद्रप्रयाग) बीचको भग्नावशेषमा केही यात्रु पुरिएको अत्यन्तै दुःखद् खबर प्राप्त भएको छ । स्थानीय प्रशासन, एनडीआरएफ र एसडीआरएफ टोली राहत र उद्धारमा संलग्न छन् । म सम्बन्धित अधिकारीसँग सम्पर्कमा रही उद्धारको अनुगमन गरिरहेको छु । यात्रुहरूको सुरक्षाका लागि म बाबा केदारसँग प्रार्थना गर्दछु”, मुख्यमन्त्री धामीको पोस्टमा उल्लेख गर्नुभयो ।
