काठमाडौं । सेयर बजारमा बिहीबार सबैजसो प्रमुख सूचकले यसअघिका रेकर्ड तोडेका छन्। यसअघि १८८१ अंकको रेकर्ड बनाएको नेप्से सूचक बिहीबार बजार बन्द हुँदासम्म १८९३ अंक नाघेको छ। यसै दिन अन्तरदिवसीय व्यापारमा सूचक १९२६ अंकभन्दा माथि पुग्यो। यस्तै सेयरको कारोबार रकम र संख्यामा पनि नयाँ रेकर्ड बनेको छ। नेप्सेमा बिहीबार ७ अर्ब ६१ करोड ३० लाख ३० हजार रुपैयाँको सेयर किनबेच भयो। यो हालसम्मकै उच्च कारोबार हो। त्यस्तै नेप्सेको बजार पुँजीकरण पनि अहिलेसम्मकै उच्च भएको छ। बिहीबार नेपाली सेयर बजारको आकार २५ खर्ब ३७ अर्ब ४४ करोडभन्दा बढी भयो। सर्वसाधारण लगानीकर्ताको स्वामित्वमा रहेको सेयरको मात्र बजार पुँजीकरण पनि ८ खर्ब ७३ अर्ब ५३ करोड ५२ लाख नाघ्यो। यी दुवै नयाँ कीर्तिमानी आँकडा हुन्।

कुल गार्हस्थ उत्पादन (जीडीपी)सँगको अनुपातमा सेयर बजारको आकार दुई तिहाइभन्दा ठूलो भएको छ। केन्द्रीय तथ्यांक विभागले गत वर्षको जीडीपी ३७ खर्ब ६७ अर्ब ४ करोड रहेको उल्लेख गरेको छ। जीडीपीको अनुपातमा सेयरको कुल बजार पँुजीकरण ६७ प्रतिशत र फ्लोट बजार पँुजीकरण २३ प्रतिशत छ। त्यस्तै नेप्सेमा बिहीबार एकै दिन ७० हजार पटक सेयर किनबेच भयो। यति धेरै कारोबार यसअघि कहिल्यै भएको थिएन। यसदिन १ करोड ७१ लाख ८८ हजार कित्ता सेयर किनबेच भयो। 

योचाहिँ हालसम्मको दोस्रो बढी कारोबार भएको नेप्सेका प्रवक्ता मुराहरि पराजुलीले बताए। लामो समयदेखि रोकिएको वाणिज्य बैंकको सेयर मूल्य बढ्न थालेपछि नेप्सेमा नयाँ कीर्तिमानी कारोबार भएको हो। बिहीबार वाणिज्य बैंक समूहको परिसूचक २.७ प्रतिशत बढेको छ।यसअघि ४ मंसिरमा नेप्सेमा ६ अर्ब रुपैयाँभन्दा बढीको सेयर किनबेच भएपछि प्रवक्ता पराजुलीले अनलाइन प्रणालीका कारण सेयर बजारको कारोबार चुलिएको बताएका थिए। पछिल्लो समय कोरोना महामारीले लगानीको वातावरण संकुचित भएपछि सेयर बजारबाट पैसा कमाउने प्रवृत्ति बढेको छ। यसका लागि ठूला लगानीकर्ताले म्युचुअल फन्डमार्फत सेयर बजारमा ठूलो लगानी भिœयाएर बजार उकास्न मद्दत गरेको केही ब्रोकरले बताएका छन्।

‘बजार बढ्छ भनेपछि जुनसुकै तरिकाले बढाउने प्रयास हुन्छ,’ ती ब्रोकर भन्छन्, ‘अहिले पनि त्यही भएको छ।’ तर, कतिपय ब्रोकर र विश्लेषकले अब नयाँ लगानीकर्ता बजार प्रवेश गर्नु जोखिमपूर्ण हुने बताएका छन्। बढ्दो बजारमा तल्लो तहबाट नयाँ लगानीकर्ता प्रवेश गर्नु उचित हुने भए पनि अब बजार निकै माथि पुगिसकेको उनीहरू बताउँछन्।

‘अब बजार धेरै माथि जाने सम्भावना कम हुन्छ। त्यसै पनि उतारचढाव आउन सक्छ,’ सेयर विश्लेषक लोचन कोइराला भन्छन्, ‘अहिलेसम्म केही पैसा कमाइसकेका मान्छेले जोखिम लिन्छन् तर यो स्तरमा पुगेपछि नयाँ मान्छेले बजारमा पैसा खन्याउँदाचाहिँ विचार पुर्‍याउनुपर्छ।’ अन्नपुर्णपोष्ट दैनिक