सर्लाही । स्वतन्त्र सांसद अमरेशकुमार सिंहमाथि गृहजिल्ला सर्लाहीमा नाराबाजी र ढुंगामुढा भएको छ ।
सर्लाही क्षेत्र नं.–४ का सांसद सिंहले धनकौल गाउँपालिकाका स्थानीयबासी र समर्थकमाझ मन्त्यव्य दिने क्रममा अर्को पक्षले उत्तेजक र द्वन्द फैलाउने अभिव्यक्ति दिएको भन्दै विरोध गरेको थियो । त्यसक्रममा नेपाली कांग्रेसका कार्यकर्ता र स्थानीयबासी पनि उनको विरोधमा उत्रिएका थिए ।
उनीमाथि जातीय द्वन्द्व फैल्याउने गरी भाषण गरेको आरोप कांग्रेसका कार्यकर्ताले लगाएका छन् । सिंह २०७९ सालमा भएको संसदीय चुनावमा कांग्रेस छाडेर स्वतन्त्र रुपमा विजयी भएका थिए ।
स्थानीय दुई पक्षबीच तनाव भएपछि प्रहरीले सिंहलाई समेत सुरक्षा दिएको थियो । सिंहमाथि ढुङ्गामुढा समेत भएको प्रत्यक्षदर्शीले बताएका छन् । त्यसक्रममा प्रहरी र एकजना सर्वसाधाण घाइते भएका छन् ।
उनी धनकौलस्थित एक घरमा बसिरहेको समयमा प्रहरीले सुरक्षा दिएका थिए । उता सांसद सिंहले पनि मतदातासँग छलफलमा रहेको समयमा आक्रमण प्रयास भएको बताएका छन् । उनले मतदातासँग रहेका केही तस्बिर पनि सामाजिक सञ्जालमा पोस्ट गरेका छन् ।
