काठमाडौं । अमेरिकाको टेक्सासस्थित ह्युष्टनमा नेपाली विद्यार्थी मुना पाण्डेको गोली हानी हत्या भएको छ । पाण्डेको शव गोली लागेको अवस्थामा फेला परेको हो ।
छातीमा गोली लागेको अवस्थामा अपार्टमेन्टमा मुनाको शव भेटिएको हो । लगत्तै प्रहरीलाई खबर गरिएको थियो । स्थानीय समयअनुसार सोमबार बेलुका ५ बजेर ३५ मिनेटमा प्रहरी घटनास्थलमा पुग्दा उनलाई मृत अवस्थामा भेटाएको हो ।
घटनाबारे जानकारी पाएपछि प्रहरीको टोली वेष्ट एयरपोर्ट ब्लुभार्डमा रहेको घटनास्थलमा पुगेको र त्यहाँ पुग्दा २१ बर्षकी महिला मृत अवस्थामा भेटिएको प्रहरीले जनाएको छ । घटना कसरी भयो भन्ने पत्ता लागेको छैन । प्रहरीले अनुसन्धान सुरु गरिसकेको छ ।
गोली लागेको अवस्थामा भेटिएको शव पोष्टमार्टमका लागि पठाइएको छ । घटनासँग सम्बन्धित कसैलाई पक्राउ गरिएको छैन ।
नेपालको भोजपुरकी पाण्डे ह्युस्टन कम्यूनिटी कलेजमा अध्ययनरत थिइन् । उनी ३ बर्ष अगाडि सन् २०२१ मा अध्ययनका लागि अमेरिका पुगेको बताइएको छ । उनी परिवारमा एकमात्र सन्तान भएको बताइएको छ ।
शनिबारदेखि नै फोन अफ रहेकाले घटना शनिबार नै भएको हुनसक्ने आशंका गरिएको छ । तर घटना कहिले र कसरी भएको हो भन्नेबारे अझै पुष्ट विवरण प्राप्त भएको छैन । घटनास्थलमा कुनै हतियार पनि नभेटिएको प्रहरीले जनाएको छ ।
