काठमाडौँ । रामेछाप हुँदै सुनसरी पुगेका चारवटा मालबाहक ट्रक नियन्त्रण पछिको छानबिनमा काठ तस्करीको खुलासा भएको छ ।
रामेछापबाट सिन्धुली हुँदै सुनसरी पुगेका चार ट्रक अनुसन्धानको क्रममा खयर काठ तस्करीको खुलासा भएको हो ।
प्रशासनको ठाडो आदेशमा नियन्त्रणमा लिइएका ति ट्रकबारे छानबिन थालिएपछि काठ तस्करीको विषय बाहिर आएको हो । सुनसरीका प्रमुख जिल्ला अधिकारी रामचन्द्र तिवारीकाअनुसार सम्बन्धित जिल्लाबाट ट्रकलाई छोडपुर्जी दिँदा उल्लेखित परिमाणमा नै कैफीयत भेटिएको छ । धरानमा रहेको सूर्य कत्था उद्योगको नाममा काठ लोड गरी ल्याइएका ती ट्रक नियन्त्रणमा लिई वन कार्यालय सुनसरीलाई अनुसन्धानको जिम्मा दिइएको प्रजिअ तिवारीले बताउनु भयो । छानबिनका क्रममा अवैध काठ धेरै भेटिएको बताउँदै प्रजिअ तिवारीले टाँचा लगाएको भन्दा ठूलो संख्यामा काठका मुडा भेटिनुले संगठित मिलेमतोको सम्भावना देखिएको बताउनु भयो ।
प्रजिअ तिवारीले भन्नुभयो, ‘काठमा लगाइएका टाँचा विधिपूर्वक थिएन । वन कार्यालय रामेछापले लगाएको टाँचा केवल नाम मात्रको थियो । ति ट्रक एक दिन सिन्धुलीमा समेत रोकिएका रहेछन् । त्यसपछि सुनसरीको लागि आएको देखिन्छ । सुनसरीमा आइपुगेका ट्रक चेकजाँचका क्रममा अवैध काठ रहेको पुष्टि भयो । जुन मिलेमतो बेगर सम्भव नै छैन ।’
सुनसरी प्रशासनका अनुसार नियन्त्रणमा लिइएका ट्रकको हकमा वन कार्यालय रामेछापले १५ सय लकडीमा टाँचा लगाइएको भनि छोडपुर्जी दिएको थियो । अनुसन्धानको क्रममा गणना गर्दा भने २ हजार ७ सय ३३ वटा भेटिएको थियो । उक्त परिमाणका काठ बा।प्र।०१००६ख२१११, बा।प्र।०१००६ ख ३३४९, मप्र०३००२ख००९५ र कप्र०२००१ख०४१९ नम्बरका ट्रकमा रामेछापबाट लोड गरी सुनसरी ल्याई पुर्याइएको प्रशासनले जनाएको छ । प्रशासनले उक्त काठ तस्करीमा सुरक्षा निकायदेखि वन कार्यालयसम्मकै संलग्नता रहेको आशंका गरेको छ । सुनसरी प्रशासनले नियन्त्रणमा रहेका ट्रक र चालक सहितको हकमा कानून बमोजिमको कारबाही हुने जनाएको छ । काठ तस्करीको विषय सुक्ष्म रुपले छानबिन हुनसके वन पैदावार चोरी निकासीमा संलग्नहरु कानूनी दायरामा आउने जनाएको छ । स्रोतका अनुसार खयर काठ बोकेका ट्रक इनरुवा आइपुगेपछि प्रशासनले रोक्न भनेको थियो । यद्यपि ति ट्रकबारे धरान पुगेपछि मात्रै प्रशासनलाई खबर दिइएको थियो ।
