एजेन्सी । अभिषेक शर्मा भारतीय टोलीमा आबद्ध हुनेबित्तिकै चर्चामा आउन थालेका छन् । करियरको पहिलो अन्तर्राष्ट्रिय खेलमा खाता नै नखोलेर आउट भएका अभिषेकले दोस्रो खेलमा धमाकेदार शतक बनाएर सबैलाई अवाक बनाएका थिए ।
यो शतकसँगै अभिषेकले हिटम्यान भनेर चिनिने रोहित शर्माको कीर्तिमान पनि तोडे । रोहित शर्माको कीर्तिमान तोड्दै अभिषेक नयाँ ‘सिक्सर किंग’ बनेका छन् ।
भारतीय टोली पाँच खेलको टी–२० सिरिजको लागि जिम्बाब्वे भ्रमणमा छ । यस भ्रमणको पहिलो खेलमा नै अभिषेक शर्माले अन्तर्राष्ट्रिय डेब्यु गरेका थिए, जसमा उनी खाता नखोली नै प्याभिलियन फर्किएका थिए । त्यसपछि दोस्रो खेलमा अभिषेकले बलियो पुनरागमन गर्दै ४७ बलमा ७ चौका र ८ छक्का प्रहार गर्दै १०० रन बनाए ।
यस इनिङ्समा ८ छक्का प्रहार गर्दै अभिषेक २०२४ मा सबैभन्दा धेरै छक्का प्रहार गर्ने भारतीय ब्याट्सम्यान बने । उनले रोहित शर्मालाई पछि पारे । अभिषेकको शतक अघि, रोहित शर्मा यस वर्ष टी–२० मा सबैभन्दा बढी छक्का प्रहार गर्ने भारतीय ब्याट्सम्यानको सूचीमा शीर्षमा थिए, जसले ४६ छक्का प्रहार गरेका थिए ।
तर, अब अभिषेकले ५० छक्का लगाएर यो सूचीको शीर्ष स्थानमा पुगेका छन् । यो सूचीमा विराट कोहली ४५ छक्कासहित तेस्रो, शिवम दुबे ४१ छक्कासहित चौथो स्थानमा र रजत पाटीदार ३३ छक्कासहित पाँचौं स्थानमा छन् ।
