एजेन्सी । आईपीएल २०२४ को फाइनल आज आइतबार चेन्नईको एमए चिदम्बरम चेपौक स्टेडियममा बेलुका ७ः४५ बजे कोलकाता नाइट राइडर्स र सनराइजर्स हैदरावादबीच हुनेछ ।
दुई पटकको च्याम्पियन कोलकाता नाइट राइडर्स यसअघि अहमदाबादमा भएको पहिलो क्वालिफायरमा सनराइजर्स हैदरावादलाई पराजित गर्दै फाइनलमा पुगेको थियो ।
अर्कोतर्फ शुक्रबार चेपौकमा भएको दोस्रो क्वालिफायरमा एक पटकको विजेता सनराइजर्स हैदरावादले राजस्थान रोयल्सलाई पराजित गर्दै फाइनलमा स्थान बनाएको हो ।
कप्तान प्याट कमिन्सको नेतृत्वमा सनराइजर्स हैदरावादले यो सिजन दुई पटक कोलकाता नाइट राइडर्ससँग खेलेको छ तर दुवै पटक हार बेहोरेको छ ।
योसँगै श्रेयस अय्यरको नेतृत्वमा रहेको कोलकाता नाइट राइडर्स यस सिजनमा फरक देखिएका छन् । गौतम गम्भीर मेन्टर बनेपछि टोली यस सिजन उत्कृष्ट लयमा देखिएको छ । उनको कप्तानीमा दुई पटक च्याम्पियन बनेको टोली उनको प्रशिक्षणमा तेस्रो उपाधिबाट एक जित मात्र टाढा छ ।
सनराइजर्स हैदरावादको तागत
कप्तान प्याट कमिन्सको टोलीको सबैभन्दा ठूलो बल उनीहरूको ओपनिङ ब्याटिङ जोडी हो । ट्राभिस हेड र अभिषेक शर्र्माले उत्कृष्ट ब्याटिङ गर्दै टोलीलाई धेरै खेल जिताउन सफल भएका छन् । यस्तै, हेनरिक क्लासेनले यो सिजन मिडल अर्डरमा आफ्नो आक्रामकताबाट प्रभावित पारेका छन् ।
कोलकाता नाइटराइडर्सको तागत
जारी सिजनमा कोलकाता नाइट राइडर्सका ओपनिङ जोडीले पनि उत्कृष्ट प्रदर्शन गरेका छन् । साल्ट घर फर्केपछि सुनील नारायणले गुरबाजको साथपाएका छन् । टोलीका दुई मिस्ट्री स्पिनर नारायण र वरुण चक्रवर्तीको चेपौकमा उत्कृष्ट कीर्तिमान छ ।
सनराइजर्स हैदरावादको कमजोरी
मिचेल स्टार्कविरुद्ध ट्राभिस हेडको कीर्तिमान खासै राम्रो छैन । सनराइजर्सको ब्याटिङमा हेड र अभिषेक असफल हुँदा टोली अगाडी बढ्न सकेको छैन । मध्यक्रममा उनीहरुको पूर्ण निर्भरता क्लासेनमा जान्छ ।
कोलकाता नाइट राइडर्सको कमजोरी
केकेआरका लागि पनि मिडल अर्डरले यो सिजन धेरै रन बनाउन सकेको छैन । यदि शीर्ष क्रम फाइनलमा असफल भयो भने, केकेआर पनि यहाँ समस्यामा पर्न सक्छ । सनराइजर्सका स्पिनरहरूले यहाँ ब्याट्सम्यानलाई समस्यामा पार्न सक्छन् ।
